Cântico 2

₁Xee ma rosa poty Sarom rupigua rami,

ha'e yvoty yvyugua rupi ikuai va'e rami.

₂Yvoty juu mbyte oĩ va'e rami ae avi

kunhataĩgue mbyte xerembiayvu iporã.

₃Ha'e gui yvyra ikuai va'e mbyte maçã'y hi'aĩ va'e rami

kunumigue mbyte xerembiayvu iporã.

Ikuaray'ã py aguapyxe vai,

ha'e hi'a voi he'ẽ porã xevy.

₄Xereraa opy ja'o okaruaty py,

ha'e xe'áry rupi omopu'ã bandeira xerayvua kuaa ukaarã.

₅Anhemombaraete 'rã uva pirekue py,

anhenhandu porã 'rã maçã ha'u vy.

Mba'eta ayvu vaipa vy naxepytuẽ kuaavei.

₆Ijaxua regua toĩ xeakã guýry,

ha'e rã oiporu kuaa regua ma taxekuavã.

₇Jerusalém memby kuery, pendevy pe ajerure

guaxu ha'e guaxu kunha ka'aguy rupi ikuai va'e rupi:

Pemomyĩ eme rojoayvua, tove toke ranhe,

ha'e ae ovyxe e'ỹa ja.

₈Aendu xerembiayvu ijayvu rã.

Ma'ẽ, ha'e ou pojava yvyty áry rupi,

yvy'ã ikuai va'e rupi opo-opo ouvy.

₉Xerembiayvu ma guaxu e'ỹ vy guaxu ra'y'i rami inhakuã va'e.

Ne'exa, orero mbotya kupe py hi'aĩ,

janela rupi oma'ẽ ho'amy,

oexa pota ho'amy janela jokoa pa'ũ gui.

₁₀Ha'e gui xerembiayvu ijayvu vy aipoe'i xevy:

Xerembiayvu, epu'ã ke.

Xemba'e porã, eju.

₁₁Mba'eta yro'y oaxa ma,

oky voi oaxapa ma.

₁₂Yvoty henhoĩmba ma yvy re,

ovaẽ ma guyra kuery onhe'ẽ aguã ára.

Pyku'i voi onhe'ẽ nhendu ma nhandeyvy rupi.

₁₃Figo'y voi ijypy ma hi'a aguã,

uva poty reakuã voi nhaetũ ma.

Epu'ã na xerembiayvu.

Xemba'e porã, eju ke.

₁₄Xerymba apykaxu,

ita pa'ũ ha'e itaova yvateve renhemia rupi reiko va'e,

exa uka na nderova,

ha'e taendu ndeayvu.

Mba'eta ndeayvua he'ẽ,

ha'e nderova ma aexaxe vai va'e.

₁₅Pejopy na mbyku ha'e mbyku'i uvaty ombovaipa va'e,

mba'eta oremba'e uvaty rupi ipotypa ma.

₁₆Xerembiayvu ma xemba'e, ha'e xee ma imba'e aiko.

Ha'e ma omongaru 'rã guymba kuery yvoty ikuaia rupi.

₁₇Xerembiayvu, ára yro'y rei'i ha'e pytũ e'ỹ teria ja ejevy ju.

Enha ejuvy guaxu e'ỹ vy guaxu ra'y'i rami, yvyty itatya rupi.