Cântico 1

₂Xerayvu ndejuru py,

mba'eta vinho gui ha'eveve ndee xerayvua.

₃Nereakuã porãa aetũ rã iporã,

nderery voi heakuã va'e onhoẽ mbyre rami ha'eve va'e.

Ha'e ramo kunhataĩgue ha'e javi 'rã nderayvu.

₄Xereraa ndereve! Jaa pojava!

Xeruvixave xereraa ndero py.

Ndee ae roguerovy'a rovy'a etea rupi.

Rejoayvua re orema'endu'a porã 'rã, vinho gui ha'eveve ramo.

Ha'evea rami ha'e kuery nderayvu.

₅Kunhague Jerusalém pygua, xeũ va'eri xeporã.

Xepire ma Quedar rupi oo pirekue guigua rami huũ va'e,

ha'e ajukue Salomão ro py oĩ va'e rami.

₆Pema'ẽ ngatu eme xepire huũa re,

mba'eta kuaray ae ma xemoũmba.

Xekyvy kuery xemotare'ỹ rei vy

xemondouka karamboae uvaty re apena aguã.

Ha'e rami rã xemba'e uvaty re ma xee napenai.

₇Ha'e gui ndee xerekovea rembiayvu, emombe'u xevy:

Mamo tu remongaru 'rã herekovy nerymba kuery?

Mamo tu remombytu'u 'rã kuaray mbyte jave?

Emombe'u ke, xee roekaa rupi avaẽ e'ỹ aguã

neirũ kuery guymba re openaa py.

₈Kunhague pavẽ gui neporãve va'e, ha'e nunga ndereikuaai ri vy

tereo ha'vy mymba kuery pypo rupi,

ha'e emongaru nerymba kavara kuery vexa'i re opena va'e kuery ikuaia rupi.

₉Xerembiayvu, neporã vaipa

kavaju kunha Faraó mba'e karóxa regua rami.

₁₀Nderova ma iporã nenamixã mbyte,

ndeaju'y voi mbo'y oĩ reve.

₁₁Ndejeguarã rojapo 'rã ouro gui,

prata py ijeguapa va'e gui voi.

₁₂Xeruvixave okaruaty py oĩa py

oetũ 'rã oiny xereakuã porãa.

₁₃Xevy pe ma xerembiayvu iporã

heakuã porã va'e ryru xekã mbyte oĩ va'e rami.

₁₄Yvoty En-Gedi katy uvaty ikuai va'e rupi henhoĩ va'e rami,

xevy pe xerembiayvu ha'e rami ae ha'eve.

₁₅Ma'ẽ xerembiayvu, ndee ma neporã.

Nderexa voi apykaxu rexa rami iporã.

₁₆Xerembiayvu, ndee voi neporã, roayvu.

Nhanderupa ma jai rogue pyau guigua.

₁₇Nhandero yta rami guarã yary ikuai,

ha'e rã yvyra ijao'ia ma cipreste guigua.