Cântico 3

₁Pyávy xerupa py xetui jave

aeka xerekovea rembiayvu.

Aeka-eka teĩ ndajoui.

₂Ha'e gui apu'ã avy vy tetã rupi ajere aikovy.

Tetã mbyte ha'e tape ikuai va'e rupi aa vy

aeka xerekovea rembiayvu, aeka teĩ ndajoui.

₃Ha'e gui tetã rarõa kuery xerovaexĩ tetã rupi onhangarekoa rupi.

Ha'e rã ha'e kuery pe xee aporandu: “Pexa pa xerembiayvu?” ha'e.

₄Ha'e gui ma ajepe'a'i avy vy mae ma aovaexĩ xerembiayvu.

Aikuavã vy namondoukavei.

Ha'e gui aroike ha'i xemokambuare ro py.

₅Jerusalém memby kuery, pendevy pe ajerure

guaxu ha'e guaxu kunha ka'aguy rupi ikuai va'e rupi:

Pemomyĩ eme rojoayvua, tove toke ranhe,

ha'e ae ovyxe e'ỹa ja.

₆Mba'e tu peva'e tekoa e'ỹa gui jogueru jekuaa nhoguenoiny va'e?

Tata rataxĩ opu'ã va'e ramigua ou,

ha'e heakuãmba ouvy mirra ha'e heakuã porã va'e okaia py,

opa marãgua heakuã porã va'e vendeaty kuery ogueru va'ekue py.

₇Ne'exa, huvixa Salomão karóxa ae ou jekuaa.

Ijyke jovaive rupi sessenta avakue ogueru,

Israel regua ipy'a guaxukueve.

₈Ha'e kuery ha'e javi ma kyxe oiporu kuaa,

joe opu'ã kuaa va'e vy.

Peteĩ-teĩ oku'a re kyxe oguereko,

pytũ rupigua gui joepy aguã.

₉Karóxa ma huvixa Salomão ojeupe guarã ae ojapo uka va'ekue

yvyra Líbano regua gui.

₁₀Ijytarã ma ojapo prata gui,

hendarã ma ojapo ouro gui,

ha'e rã oguapya aguã ma púrpura gui ojapo.

Opy ha'e javi rupi Jerusalém pygua kunhague

ombojegua porã'i oayvua rupi.

₁₁Ha'e gui Sião memby kuery, peju, pema'ẽ

huvixa Salomão akã re coroa oĩ va'e re.

Ha'e va'e ma ixy ae ome'ẽ va'ekue

omendaa ára py, opy'a py oguerovy'a vy.