Salmo 99

₁Senhor ma huvixave oĩ.

Yvy regua kuery toryryipa.

Ha'e oguapy oiny anjo ipepo va'e kuery áryve.

Yvy tomyĩmba.

₂Senhor ma yvate ete Sião tetã py,

yvy regua kuery ha'e javi áryve oĩ.

₃Ha'e kuery togueroporaei hery yvate ete va'e okyjepy,

iky'a e'ỹ va'e ramo.

₄Ndee ma huvixave ipo'akapa va'e reiko,

teko porã reayvu va'e.

Peteĩ rami joguerekoa remoĩ.

Jacó kuery mbyte rejoguereko anhetẽ ete rupi, ha'evea rami meme.

₅Pemboete ke Senhor Nhanderuete!

Ipyrõa renonde peĩ penerenapy'ã re,

iky'a e'ỹ va'e ramo.

₆Moisés ha'e Arão ma ixupegua sacerdote ikuai raka'e,

Samuel voi hery rupi ojapukai va'ekue regua.

Senhor pe ha'e kuery ojapukai ramo ombovai.

₇Arai oĩ va'e gui ijayvu raka'e ha'e kuery pe.

Ha'e ramo ha'e kuery onhe'ẽ rendu,

lei hekorã oeja va'ekue rupi ikuai raka'e.

₈Senhor Oreruete, ndee ma rembovai va'ekue ha'e kuery ojapukai rã.

Ha'e kuery pe rexa uka Oreruete joperdoa va'e reikoa,

ojejavyague remboekovia va'e guive.

₉Peroporaei Senhor Nhanderuete.

Ixupegua yvyty iky'a e'ỹ va'e renonde peĩ penerenapy'ã re,

Senhor Nhanderuete iky'a e'ỹ va'e ramo.