Salmo 91

₁Yvate ete va'e oĩa py onhemi va'e,

Ipo'akapa va'e 'ã py ikane'õgua va'e ma

₂aipoe'i 'rã Senhor pe: “Anhemia imbaraete va'e,

Xeruete, hexe ajeroviaa va'e”, he'i 'rã.

₃Mba'eta ha'e ma ndereraa jepe 'rã nhuã py rami nembo'axe va'e gui,

mba'eaxy jojuka va'e gui guive.

₄Nemo'ã 'rã guague guy py.

Ipepo guy py reĩ rã mba'eve rei ndoikoi 'rã.

Ixuguigua anhetẽ va'e ma hu'y jokoa ha'e nhomo'ãa tuvixa va'e rami oĩ.

₅Ha'e ramo pytũ rupi jojukaa oiko teĩ ndee nderekyjei 'rã,

neĩ ára py hu'y ndere ou va'e gui,

₆mba'eaxy pytũ rupi jojuka va'e gui,

neĩ mba'emo vai kuaray mbyte jave jojuka va'e gui ma voi.

₇Ndeyvýry mil ho'a,

ndeaxu e'ỹa katy dez mil ho'a teĩ

ndere ma mba'eve rei novaẽi 'rã.

₈Nderexa py rive 'rã rexa

heko vai va'e ombopagaa ramo.

₉Mba'eta Nhanderuete pe “Anhemia”, 're,

ha'e Yvate ete va'e pe “Xee aĩaty” 're ramo

₁₀neĩ peteĩ henda py ma voi nderejexavai 'rã,

neĩ peteĩve mba'emo vai novaẽi 'rã ndero py.

₁₁Mba'eta ndere omopena uka 'rã ojeupegua anjo kuery pe,

reikoa ha'e javi rupi onhangareko aguã ndere.

₁₂Ha'e ramo ha'e kuery opo py ndejopy 'rã

peteĩve ita re renhepyxanga e'ỹ aguã.

₁₃Ha'e ramo repyrõ 'rã guary ha'e mboi vaikue re,

guary ra'y ha'e mboi re voi repyrõ 'rã inony.

₁₄Aipoe'i 'rã: “Xerayvu va'e ma araa jepe 'rã,

aepy 'rã xerery oikuaa va'e.

₁₅Xevy pe ojapukai ramo xee ambovai 'rã.

Ojexavaia py xee aĩ 'rã hexeve.

Araa jepe 'rã, ha'e amboete uka 'rã.

₁₆Amoingo porã 'rã hekove puku aguã rami,

ha'e ixupe aexa uka 'rã araa jepea.”