Salmo 92

₁Senhor, ha'eve roguerovy'a

ha'e nderery rupi aporaei, Yvate ete va'e.

₂Aje'ive aikuaa uka 'rã ndeporayvua,

ha'e pyávy ju aikuaa uka 'rã ojeroviapy reikoa,

₃mbaraka dez ixã va'e, mbaraka reve,

ha'e ixã reta va'e pu rupi guive.

₄Mba'eta Senhor, mba'emo porã rejapo rã aexa vy avy'a.

Arovy'a mba'emo ndepo py rejapo va'e.

₅Senhor, nerembiapo ma tuvixa ete va'e!

Ha'e renhembopy'aa guive haxy ete aikuaa aguã.

₆Hi'arandu e'ỹ va'e ndoikuaai 'rãe,

inhakã porã e'ỹ va'e ndoikuaai 'rã pova'e:

₇Heko vai va'e kuery ma jai rogue opa rupi henhoĩ va'e rami ikuai,

teko vai rupi ikuai va'e hetave oje'oivy teĩ

omombaa 'rã raka'e rã peve.

₈Ha'e rã Senhor, ndee ma Yvate ete va'e raka'e rã peve guarã.

₉Senhor, eexa pota nderovaigua kuery re.

Mba'eta nderovaigua kuery okanhymba 'rã,

teko vai rupi ikuai va'e oaĩmba 'rã.

₁₀Ha'e rã xee ma xemombaraete 'rã toro ka'aguy regua rami,

xere azeite iporãve va'e remoĩ vy.

₁₁Avy'a reve aexa 'rã xerovaigua kuery xemoĩ vai va'e re mba'emo oiko ramo,

aendu 'rã guive heko vai va'e xere opu'ã rei va'e kuery ho'apa rã.

₁₂Ha'e rã heko porã va'e ma pindo rami 'rã oiko porã,

yvateve 'rã Líbano yvy re yary ikuai va'e rami.

₁₃Senhor roka py onhotỹ mbyre rami 'rã ha'e kuery ikuai,

oiko porã 'rã okuapy Nhanderuete pegua roka rupi.

₁₄Ha'e nunga ma hi'yvyma ma teĩ hi'a riae 'rã,

tykue tynyẽ riae, ha'e ipyau riae 'rã.

₁₅Ha'e rami vy oikuaa uka 'rã Senhor heko porã va'ea.

Ha'e ma xe'itaova, hexe ma teko vai noĩ.