Salmo 90

₁Senhor, ndee ma ronhemiaty reiko,

ymave rupi oreramoĩ kuery ikuaia guive.

₂Yvyty oiko e'ỹ mbove,

yvy renhono e'ỹ mbove ma voi,

jypy'i guive opa peve ndee ae Senhor reiko.

₃Ndee ma avakue remombytapa ju 'rã yvy ku'i rive,

“Ha'ekue rami ju pepyta, avakue ra'y kuery”, 're vy.

₄Ndevy pe mil ma'etỹ oaxa va'e ma kuegua ára guare rami,

peteĩ hora'i pyávy oaxa va'e rami guive.

₅Ndee ma orembotyryry 'rã yy mba'emo ogueroxyry heravy va'e rami.

Ha'e ramo oke va'e rami meme 'rã ropyta,

jai rogue aje'ive'i reve henhoĩ va'e rami.

₆Mba'eta ha'e nunga ma yvate vyve ipotypa 'rã

teĩ ka'aru jave he'õmba ha'e ipirupa 'rã.

₇Ndepoxya ma oremokanhy 'rã,

ndevaia oremondyi 'rã.

₈Mba'eta nerenonde reru orereko vaia,

nhemi rupi rojejavyague voi remoĩ nderova rexakãa py.

₉Roikoa ára ma ndepoxya rupi meme 'rã oaxa ovy,

ma'etỹa roguereko va'e ma xapy'a'i ropẽxaa rami 'rã oaxa.

₁₀Setenta ma'etỹ ete'i 'rã roiko.

Amongue'i imbaraeteve va'e tema oikove 'rã oitenta ma'etỹ peve'i.

Ha'e rami teĩ roiko porãvea py voi ngane'õ ha'e jexavai tema 'rã roendu.

Mba'eta roikovea oaxapa voi 'rã,

ha'e gui ma roopa 'rã.

₁₁Mava'eve ndoikuaai ndepo'aka etea rupi ndepoxya.

Mba'eta ndepoxya rupi orererekoa gui ma rokyje ete.

₁₂Orerekombo'e ke roikoa ára re roikuaa pota aguã re,

orepy'a re 'arandu oĩ aguã.

₁₃Senhor, eju ju!

Raka'e peve 'rã tu nerepenai?

Emboaxy ju nerembiguai kuery.

₁₄Aje'ive'i reve exa uka orerayvua, roporaei aguã.

Ha'e ramo rovy'a 'rã roikoa pukukue re.

₁₅Orembovy'a ju orembojexavaia ára oĩague rami,

mbovy ma'etỹ rei e'ỹ rojexavaia anho roendu rire.

₁₆Ore nerembiguai kuery pe ju tojekuaa mba'emo rejapo va'e,

ha'e oreramymino kuery pe exa uka ju nerexakãa.

₁₇Orere toĩ Senhor Oreruete oremboaxya.

Emoingo porã orepo py mba'emo rojapo va'e.

Tá, emoingo porã mba'emo rojapo va'e.