Salmo 89

₁Senhor, aporaei riae 'rã renhomboaxya re,

raka'e rã peve xejuru py aikuaa uka 'rã ojeroviapy reikoa.

₂Mba'eta aipoa'e: “Ndeporayvua ndopai 'rã,

ha'e ndereko porãa yva re remoĩ atã”, ha'e.

₃Aipo're: “Xerembiguai Davi aiporavo va'ekue pe

aura reve ajapo xereve guarã. Ha'e vy aipoa'e:

₄‘Neramymino kuery amoĩ atã 'rã raka'e rã peve guarã,

raka'e rã peve amoĩ 'rã ndepo'akaa’, ha'e”, 're.

₅Senhor, yva re oporaeia okuapy mba'emo porã rejapo va'ekue rupi,

ndevygua iky'a e'ỹ va'e kuery ijatya py ogueroma'endu'a okuapy ojeroviapy reikoa.

₆Mba'eta mava'e nda'u Senhor rami ete oiko 'rã yva re?

Yva regua kuery mava'e 'rã tu Senhor ramigua ete oiko?

₇Mba'eta ixupegua iky'a e'ỹ va'e kuery ijatya py Nhanderuete yvateve ete va'e avi oĩ,

ijyvýry ikuai va'e ha'e javi gui okyjevepy oiko.

₈Senhor Oreruete nexondaro reta va'e,

mava'e 'rã tu ndee rami ipo'akapa va'e oiko?

Senhor, ndejee remoĩ ojeroviapy reikoa aguã.

₉Ye'ẽ opa marã omyĩ teĩ ndee ndepo'aka 'rã.

Yai opu'ã-pu'ã ramo remombytu'u.

₁₀Remokyrirĩ Raabe joguero'aa py ojuka pyre rami.

Ndejyva ipo'aka va'e py remoaĩmba nderovaigua kuery.

₁₁Yva ma nemba'e oĩ, yvy voi.

Yvy ha'e hexe ikuai va'e ha'e javi ndee ae rejapo va'ekue.

₁₂Ndee rejapo va'ekue kuaray puku-a ha'e ijapu'a'ia.

Tabor ha'e Hermom yvyty oporaei 'rã okuapy nderery rupi.

₁₃Ndejyva ma opa mba'e gui ipo'akave.

Reiporu kuaa regua reupi vy rexa uka ndepo mbaraetea.

₁₄Ha'evea rami rejoguereko, ndereko porãa rupi reiko huvixa reĩa py.

Renhomboaxya ha'e anhetẽ va'e ma nerenonde 'rã ojekuaa.

₁₅Ovy'a ete 'rã ndereroporaeia rupi ikuai va'e.

Mba'eta Senhor, ha'e kuery ndereve vy ikuai 'rã nerexakãa rupi.

₁₆Nderery rupi ovy'a riae 'rã okuapy,

oporaei 'rã ndereko porãa re.

₁₇Mba'eta ndee ma ha'e kuery mombaraetea ha'e imoexakãa.

Ndee oremboaxy ramo 'rãe ojekuaa orepo'akaa.

₁₈Mba'eta orevygua mba'emo vai jokoarã ma Senhor pegua ae oĩ,

oreruvixaverã ma Israel kuery ruete Iky'a e'ỹ va'e pegua.

₁₉Ymave rupi ndevygua iky'a e'ỹ va'e kuery pe ndeayvu va'ekue mba'emo rexa ukaa rupi.

Ha'e vy aipo're: “Xee ambopo'aka peteĩ ipy'a guaxu va'e penepytyvõ aguã.

Peẽ kuery mbyte gui amboyvateve peteĩ aiporavo va'ekue.

₂₀Ha'e rami vy xerembiguairã Davi ajou vy

amoĩ raka'e, azeite iky'a e'ỹ va'e amoĩ uka vy hexe.

₂₁Xepo py amoĩ atã 'rã,

xepo'akaa py amombaraete 'rã.

₂₂Ha'e ramo hovaigua kuery nomoĩ vai 'rã,

heko vai va'e nomoingo axyi 'rã.

₂₃Henonde amou'ũmba 'rã hovaigua kuery,

ajukapa 'rã hexe ija'e e'ỹ va'e.

₂₄Ojeroviapy aikoa ha'e xeporayvua rupi 'rã areko.

Ha'e ramo xerery rupi vy ipo'akave 'rã ovy.

₂₅Ajapo 'rã ye'ẽ ha'e yakã ikuai va'e re

ipo'aka aguã rami.

₂₆Xevy pe ojapukai vy aipoe'i 'rã:

‘Ndee ma Xeru, Xeruete,

ha'e itaova xereraa jepea guive’, he'i 'rã.

₂₇Ha'e rã ixupe aipoa'e: ‘Xera'y jypy guare.

Yvy regua ruvixave ikuai va'e gui ndeyvateve’, ha'e 'rã.

₂₈Amboaxya rupi riae 'rã areko,

ha'e hexeve amoĩ atãve 'rã xereve guarã ajapo va'ekue.

₂₉Hamymino kuery ajapo 'rã ikuai riae aguã rami,

ipo'akaa voi yva rami 'rã oĩ riae.

₃₀Ha'e rã xapy'a rei ta'y kuery nda'ikuaixei 'rã lei aeja va'ekue rupi,

ambo'eague rami e'ỹ ikuai vy,

₃₁xapy'a rei xeayvuague rami nda'ikuai 'rã,

ajapo uka va'ekue ndojapoxei vy.

₃₂Ha'e rami ri ramo yvyra rovi py ambopaga 'rã otekoavyague re,

ambopi 'rã ojejavyague re.

₃₃Ha'e rami teĩ ixugui ma ndaipe'ai 'rã ayvua,

ndajapo e'ỹi 'rã hexeve xeayvuague.

₃₄Xereve guarã ajapo va'ekue ndajapo e'ỹi 'rã,

xeayvuague ndarovai 'rã guive.

₃₅Peteĩgue'i xee aura karamboae xeky'a e'ỹa rupi ae

(ha'e xee aipo nda'e rivei 'rã Davi pe).

₃₆Aipoa'e: ‘Hamymino kuery ikuai riae 'rã,

ha'e ipo'akaa ma kuaray rami 'rã oĩ riae xerenonde.

₃₇Raka'e rã peve guarã amoĩ 'rã jaxy rami,

oaxa rive va'e'ỹ 'rã oiko yva re ojekuaa va'e rami’, ha'e va'ekue.”

₃₈Ha'e rami teĩ Senhor, oreruvixa re ndee nerepenavei vy reja.

Ndevai guive nerembiporavo pe.

₃₉Nerembiguai pe ndereve guarã rejapo va'ekue rembovaipa,

ixupegua coroa nerembovarei vy remombo yvy re.

₄₀Ixupegua tetã kora ma reitypa,

hoo ikorapa va'ekue voi rembovaipa.

₄₁Mba'emo oguereko va'ekue-'ekue ma tape rupi oaxa va'e-va'e ogueraapa 'rã,

hoo katy rai'i ikuai va'e voi ovy'a rei okuapy hexe.

₄₂Hovaigua kuery ma rembopo'aka,

rejapo hexe ija'e e'ỹ va'e ha'e javi ovy'a aguã rami.

₄₃Ha'e rã ikyxe ma rejapo naĩmbei rei aguã rami,

ha'e joguero'aa py oo ramo nereipytyvõvei.

₄₄Iporãague ma reipe'apa,

ha'e henda oĩaty reity yvy rupi.

₄₅Ikunumia ára remomba voi,

ha'e oxĩmba aguã rami rejapo.

₄₆Senhor, raka'e peve 'rã ha'e ramigua oiko,

raka'e peve nda'u nderejexa ukai 'rã?

Ndepoxya nda'u hendy riae 'rã ri tata rami?

₄₇Nema'endu'a xapy'a'i aikoa re.

Mba'everã e'ỹ teve remoingo avakue ra'y kuery.

₄₈Mava'e ava nda'u oikove 'rã manoa oexa e'ỹ re?

Mava'e nda'u onhe'ẽ ae ogueraa jepe kuaa 'rã yvyra rupa po'akaa gui?

₄₉Senhor, mba'e tu oiko ymave rupi ndeporayvu aguã re ndeayvuague,

ha'e rami aguã re ojeroviapy reikoa rupi Davi pe reuraague rire?

₅₀Senhor, nema'endu'a ke nerembiguai kuery re ovy'aa rei okuapya re,

ha'e heta regua ombojaru reia aropo'aka va'e re.

₅₁Nderovaigua kuery ijayvu vaikue-ikue, Senhor.

Nerembiporavo oikoa re ijayvu vaikue okuapy.

₅₂Senhor re ta'ima'endu'a porãa raka'e rã peve.

Amém! Amém!