Salmo 88

₁Senhor ma Xeruete xereraa jepea.

Ára pukukue re, pyávy voi ajapukai ndevy.

₂Anhembo'ea tonhendu nerenonde.

Ejapyxaka ke ajapukaia re.

₃Mba'eta xenhe'ẽ py aendu opa marãgua nda'eveia,

xerekove ma manoa katy'i ma ovaẽ.

₄Yvykua katy oguejy ma ovy va'e rami xekuaa,

ava imbaraete va'e ve'ỹ ma aiko ramo.

₅Omanogue mbyte omombo pyre rami aiko,

yvykua py ojuka pyre itui va'e rami.

Ha'e kuery re ma nanema'endu'avei ma 'rã,

ha'e ndepo py nereipytyvõvei 'rã.

₆Ndee ae xemombo yvykua pukuvea py,

ijavaetevea ha'e yvykua vaikue py.

₇Mba'eta xe'áry ndepoxya ipoyi oiny,

yai py rami ndeguigua xemokangy.

₈Rejapo xerexa va'ety kuery xerejapa aguã rami,

ha'e kuery ojeguaru rei ma okuapy xegui.

Nhuã py xembo'aa rire aa jepe aguã ndaikuaavei.

₉Ajexavai ete vy ndaxerexa pyxovei ma.

Senhor, ndevy pe anho ajapukai ko'ẽ nhavõ,

ndevy ae xepo aupi.

₁₀Omanogue pe nda'u rejapo 'rã ri hexa pyrã?

Ha'e kuery nda'u ovypa 'rã ri ndevy oporaei aguã?

₁₁Ha'e kuery nda'u ituia py ijayvu 'rã ri ndeporayvua re?

Yvykua vaikue py nda'u ijayvu 'rã ri ojeroviapy reikoa re?

₁₂Pytũ reia py nda'u ojekuaa 'rã ri hexa pyrã rejapo va'e?

Yvy hexarai pyre ikuaia re teĩ nda'u ojekuaa 'rã ri ndereko porãa?

₁₃Ha'e gui Senhor, xee ma ndevy ae ajapukai xepytyvõ aguã.

Ko'ẽ te'ỹ'i re xee anhembo'e ndevy.

₁₄Senhor, mba'e re tu xereja ri?

Mba'e re tu xevy pe nderejexa ukavei ri?

₁₅Xekunumi guive ajexavaia re aiko, amano rai'i ma aikovy.

Ndee xemongyje ramo xee ndaikuaai rei aikovy.

₁₆Ndepoxya xere ou,

ndeguigua ngyje xemomba ta ma.

₁₇Ha'e nunga ha'e javi xembojere riae yy ou va'e rami,

jova-jovai gui xejoko.

₁₈Xerayvu va'e ha'e xeirũ kuery ma xea gui mombyry reipe'apa.

Ha'e ramo pytũa rive opyta aexa va'ety rami.