Salmo 86

₁Senhor, ejapyxaka ke ajapukai rã, xembovai guive,

mba'eta ajexavai vy xeporiau aikovy.

₂Ndere ajerovia ramo eraa jepe xerekove.

Xeruete, reraa jepe 'rã nerembiguai ndere ojerovia rã.

₃Senhor, xemboaxy ke,

ára pukukue re ndevy ajapukai ramo.

₄Embovy'a ju nerembiguai py'a,

ndere xenhe'ẽ aroma'endu'a ramo.

₅Mba'eta Senhor, porayvu ha'e nhomboaxy va'e reiko,

reayvu ete ndevy ojapukai va'e ha'e javi.

₆Senhor, endu ke anhembo'ea,

eikuaa pota ajapukaia re.

₇Ajexavaia ára ajapukai 'rã ndevy,

ndee xembovai ramo.

₈Senhor, ndee ramigua tuuete mboae nda'ipoi.

Nda'ipoi avi rejapo va'e ramigua.

₉Ha'e javi regua remoingo va'ekue ou vy

guenapy'ã re oĩmba 'rã okuapy nerenonde,

ha'e gui omboete 'rã nderery, Senhor.

₁₀Mba'eta ndee ma yvate ete va'e, nhomondyipaarã apoa guive.

Ndee anho Oreruete.

₁₁Senhor, xembo'e ke nderape rupi aa aguã.

Ha'e ramo aiko 'rã ndeguigua anhetẽ etea rupi.

Xepy'a re emoĩ nderery aendu vy ajererokyjea rupi anho aiko aguã.

₁₂Senhor Xeruete, xee roguerovy'a xepy'a ha'e javi py,

nderery rupi aporaei 'rã raka'e rã peve,

₁₃mba'eta ndee xerayvu ete vy

xerekove reraa jepe manoa po'akaa gui.

₁₄Xeruete, ojejou porã rei va'e kuery opu'ã ma xere,

ojerovia rei va'e xejukaxe okuapy.

Ha'e kuery nemboetea rupi e'ỹ ikuai.

₁₅Ha'e rã ndee Senhor Xeruete ma renhomboaxy ha'e ndeporayvu vaipa,

nandekuerai, opa mba'e py renhomboaxy ha'e anhetẽ rupi reiko va'e.

₁₆Ema'ẽ ke xere, xemboaxy guive.

Xemombaraete, mba'eta nerembiguai aiko,

eraa jepe nerembiguai pi'a.

₁₇Eikuaa uka xerayvua,

xere ija'e e'ỹ va'e kuery oexa vy oxĩmba aguã.

Mba'eta Senhor, ndee ae xepytyvõ ha'e xembopy'a guaxua.