Salmo 84

₁Xeruete nexondaro reta va'e,

xevy pe nembojeroviaaty ma iporã ete!

₂Xenhe'ẽ py xepoaẽ Senhor pegua oka re nda'evei vy.

Mba'eta xepy'a, xerete ha'e javi py arovy'a Nhanderuete oikove va'e.

₃Kyky'i ma oo 'rã ojou oke atyrã,

mbyju'i voi ojou 'rã guaityrã'i gua'y kue'iry oguereko aguã,

ndevygua altar yvýry,

Senhor nexondaro reta va'e, Xeruvixa ha'e Xeruete.

₄Senhor, ovy'a ete 'rã ndevygua oo py ikuai va'e.

Ha'e kuery oporaei riae 'rã ndevy.

₅Ovy'a ete 'rã avakue ndere vy imbaraete va'e,

ha'e ipy'a re oĩ taperã omoatyrõ mbyre rupi oguata aguã.

₆Yvyugua ipiru rei va'e rupi oaxa teĩ

ha'e kuery pe ojeapo 'rã yy oxyry porã reia.

Oky ypy va'e omoakỹ porãmba 'rã guive.

₇Ha'e kuery ma imbaraeteve teve 'rã oje'oivy.

Peteĩ-teĩ ojexa uka 'rã Nhanderuete renonde Sião py.

₈Senhor, Xeruete nexondaro reta va'e, endu anhembo'ea.

Jacó Ruete, ejapyxaka ke.

₉Oreruete mba'emo vai gui jokoa reiko va'e, eikuaa pota ke,

ema'ẽ huvixave reiporavo va'ekue re.

₁₀Amboae henda py mil ára aĩ 'rãgue py

ha'eveve peteĩ'i ára ndevygua roka py aĩ aguã.

Heko vai va'e rekoa py xerekoa 'rãgue py

ha'eveve Xeruete pegua rokẽ arõ aikovy aguã.

₁₁Senhor Nhanderuete ma kuaray ha'e mba'emo vai jokoa.

Senhor nhanemboaxy ha'e nhanemoexakãarã.

Teko porã rupi ikuai va'e pe nome'ẽ e'ỹi 'rã iporã va'e.

₁₂Senhor nexondaro reta va'e,

ndere ojerovia va'e ovy'a ete 'rã.