Salmo 83

₁Oreruete, ekyrirĩ eme!

Oreruete, ndeayvu e'ỹ eme, eĩ rive eme guive.

₂Mba'eta nderovaigua kuery opu'ãmba okuapy,

ndere ija'e e'ỹ va'e onhemboyvatepa.

₃Nhomongeta rei okuapy ndevygua kuery rovai,

jogueroayvu 'rã repenaa va'e kuery re.

₄Ha'e vy aipoe'i: “Peju ke, jaa jaipe'a yvy re ikuai va'e mbyte gui,

Israel kuery re ima'endu'aave e'ỹ aguã”, he'i okuapy.

₅Peteĩ rami 'rã jogueroayvu okuapy

nderovaigua ikuai aguã:

₆Edom regua ha'e Ismael guigua kuery,

Moabe regua ha'e Agar remiarirõ kuery,

₇Gibal pygua, ha'e Amom, Amaleque, Filístia

ha'e Tiro pygua kuery ha'e javi.

₈Assíria pygua kuery voi onhemoirũ 'rã ha'e kuery reve

Ló ramymino kuery oipytyvõ vy.

₉Ha'e kuery re ejapo Midiã regua kuery re rejapoague rami,

Sísera ha'e Jabim kuery re Quisom yakã yvýry rejapoague rami.

₁₀Ha'e va'e kuery ma rejukapa va'ekue En-Dor py,

ha'e ramo hu'ũmba yvy re.

₁₁Ha'e kuery regua yvatekueve re ejapo Orebe ha'e Zeebe re rejapoague rami,

huvixa kuery re ejapo Zeba ha'e Zalmuna re rejapoague rami.

₁₂Mba'eta “Jajopy 'rã Nhanderuete yvy nhanderekoarã”, he'i okuapy.

₁₃Xeruete, emoaĩmba ke yvyra rogue yvytu jere omboipa heravya rami,

mba'emo pire yvytu opa rupi ombovevea rami,

₁₄ka'aguy rupi tata oapypaa rami,

tata rendy yvyty ikuai va'e oapypaa rami.

₁₅Ha'e rami ae avi eakykue monha nde'yvytu vaikue py,

emondyipa heravy nde'yvytu atã py.

₁₆Senhor, ejapo ha'e kuery oxĩmba aguã rami,

nderery rupi ha'e kuery voi ndereka aguã.

₁₇Tove ha'e kuery toxĩmba ha'e nda'evei nho ta'ikuai raka'e rã peve.

Nda'evei reia toendu ha'e tokanhymba.

₁₈Ha'e ramo 'rãe oikuaa ndee anho Senhor nderery va'e reikoa,

ha'e yvy jave áryve Yvate ete va'ea.