Salmo 82

₁Nhanderuete renonde ijapy okuapy ojeupegua kuery.

Ha'e ramo tuuete kuery mbyte omboayvu oiny.

₂“Raka'e peve 'rã tu ha'eve'ỹa rami peikuaa pota joe?

Heko vai va'ea katy jepi ri ty peiko.

₃Ha'evea rami ete 'rãgue peikuaa pota yvyĩgue'i ha'e tyre'ỹ re.

Pepena porã ke ojexavai va'e ha'e oipytyvõ pyrã e'ỹ kuery re.

₄Peipytyvõ yvyĩgue'i ha'e iporiaukue'i,

peraa jepe heko vai va'e po gui.”

₅Ha'e kuery ma mba'eve ndoikuaai,

neĩ ndoikuaa potai va'e,

pytũ reia rupi ikuai.

Ha'e ramo yvy yta omyĩmba.

₆Xee aipoa'e va'ekue: “Peẽ kuery ma tuuete,

Yvate ete va'e ra'y kuery pendekuai”, ha'e va'ekue.

₇Ha'e rami teĩ avakue rami rive 'rã pemano,

pendekovea opa 'rã huvixa kuery mboae rami.

₈Oreruete, epu'ã ke, eikuaa pota yvy regua kuery re.

Mba'eta yvy regua ma ndevy guarã meme.