Salmo 81

₁Peporaei ke pevy'aa rupi Nhanderuete nhanemombaraetea pe.

Perovy'a Jacó Ruete.

₂Peporaei vy pembojoguy pandeiro pu py.

Pembopu porã mba'epu ixã reta va'e ha'e mbaraka.

₃Pembopu ke mimby guaxu

jaxy pyau ha'e jaxy inhypytũ nhavõ,

nhandevygua ngaru oikoa ára.

₄Ha'e rami aguã ae Jacó Ruete oeja va'ekue

Israel kuery rekorã.

₅José kuery rekorã oeja raka'e

Egito pygua kuery re opu'ã vy oo jave.

Peteĩ ayvu xee naendu kuaai va'ekue aendu ju aipoe'i rã:

₆“Pendevoyi amboguejy va'ekue pendeaxi'y áry gui,

pendepo voi aipe'a ajaka peupi heravyague gui.

₇Pejexavai vy xevy pejapukai ramo xee rogueraa jepe va'ekue.

Yapu mbyte gui xee rombovai,

roeko a'ã va'ekue guive Meribá py yy oĩ va'e yvýry”, he'i.

₈“Xevygua kuery, pejapyxaka ke pendevy xeayvu rã.

Israel kuery, peẽ kuery xenhe'ẽ rendu va'e rire.

₉Penembyte pereko eme Penderuete ramigua rive,

tuuete mboae renonde pembojerovia eme.

₁₀Xee ae ma Senhor Penderuete,

Egito yvy gui penerenoẽare.

Peipe'apa ke pendejuru, ha'e rã xee romongaru 'rã”, ha'e va'ekue.

₁₁Ha'e rami teĩ xevygua kuery naxenhe'ẽ rendui.

Israel kuery ndaxekuaa potai.

₁₂Ha'e rire xee ajapo ha'e kuery ae akã ratãa rupi ikuai aguã rami,

ha'e kuery oipotaa rami rive ikuai aguã.

₁₃Xevygua kuery xenhe'ẽ rendu va'e rire,

Xeguigua tape rupi ae Israel kuery oo va'e rire

₁₄xee amomba voi 'rãgue hovaigua kuery,

xepo'aka 'rãgue ija'e e'ỹ va'e ha'e javi re.

₁₅Senhor re ija'e e'ỹ va'e kuery ikuai 'rãgue ixupe,

ha'e rami ikuai 'rãgue raka'e rã peve.

₁₆Ha'e rã peẽ kuery ma trigo iporãve va'e re romongaru 'rãgue,

ei ita pa'ũ gui guare ame'ẽ 'rãgue penevyatãmba peve.