Salmo 80

₁Israel kuery re repena va'ety, ejapyxaka ke.

Ndee rereko José ramymino kuery mymba rami.

Anjo ipepo va'e ikuaia áry reĩa gui exa uka nerexakãa.

₂Efraim, Benjamim ha'e Manassés regua kuery pe

exa uka ndepo'akaa, eju guive orereraa jepe aguã.

₃Oreruete, oremoingo porã ju ke.

Orevy pe exa uka nderova rexakãa, roo jepe aguã.

₄Senhor Oreruete nexondaro reta va'e,

raka'e peve 'rã tu rendu rive ndevygua kuery onhembo'ea?

₅Orerexay re ae oremongaru tembi'u 'rãgue py,

karo remonyẽ orepy'a vaia roy'u aguã.

₆Rejapo orea katy'i ikuai va'e orere opu'ã aguã rami,

ha'e orerovaigua kuery orere opuka rei aguã.

₇Oreruete nexondaro reta va'e, oremoingo porã ju ke.

Orevy pe exa uka nderova rexakãa, roo jepe aguã.

₈Egito yvy gui reru raka'e peteĩ uva rakãgue'i.

Yvy regua kuery remoxẽague py renhotỹ.

₉Yvy remboa'eveague rupi hapo porã ovy,

ha'e yvy áry rupi hakã'i oaĩ ovy.

₁₀Ha'e rami vy omokuaray'ãmba yvyty ikuai va'e,

yary tuvixakueve va'e guive.

₁₁Ye'ẽ peve oo oiny hovapy,

ha'e hoky ma yakã peve oo.

₁₂Ha'e rire teĩ mba'e re tu ha'vy reity uka ikora?

Ha'e ramo tape rupi oaxa va'e tema omondo 'rã hi'a.

₁₃Tajaxu omou'ũmba 'rã,

ha'e mymba kuery nhuũndy rupigua ho'upa 'rã.

₁₄Oreruete nexondaro reta va'e, rojerure ndevy:

Ejevy ju orea py.

Pe yva gui ema'ẽ orere,

eju eikuaa pota aguã ndevygua uva rembypy re.

₁₅Epy ke ndepo py ae renhotỹ va'ekue,

hakã pyau ndejeupe guarã ae remombaraete va'ekue.

₁₆Ojayapaa ma rire oapypaa ma tata py.

Tokanhymba orerovaigua kuery ndepoxya nderova py rexa uka ramo.

₁₇Tove ndepo toĩ ndeyke re ikuai va'e kuery re,

ava ra'y ndejeupe guarã ae remombaraete va'ekue re.

₁₈Ha'e rire ore kuery ndorojepe'avei ma 'rã ndea gui.

Oremoingove ju ke.

Ha'e ramo 'rãe nderery rupi rojapukai.

₁₉Senhor Oreruete nexondaro reta va'e, oremoingo porã ju.

Orevy exa uka nderova rexakãa, roo jepe aguã.