Salmo 79

₁Oreruete, yvy regua xondaro kuery ndevygua yvy re ou.

Ndevygua templo iky'a e'ỹ va'e omongy'apa,

ha'e Jerusalém tetã ha'e javi rupi ombovaipa.

₂Nerembiguai kuery retekue oeja guyra rembi'urã,

ndevy ikuai va'ekue ro'okue ma ka'aguy rupigua rembi'urã oeja.

₃Jerusalém ha'e javi rupi omoẽ huguy yy rami,

nda'ipovei guive hetekue nhono porãarã.

₄Ha'e ramo orea katy rai'i rupi ikuai va'e ijayvu vaikue-ikue orere.

Opuka, ovy'a rei guive orere.

₅Senhor, raka'e peve 'rã tu ha'e rami oiko?

Orevy rexa uka riae 'rã teve nda'evei etea?

Orejou vaia nda'u tata rami riae 'rã ri hendy?

₆Yvy regua kuery pe jevy ke ndepoxy,

ndekuaa e'ỹ va'e kuery pe,

nderery rupi e'ỹ ojapukai va'e pe.

₇Mba'eta ha'e kuery ma omokanhymba Jacó kuery,

orerekoa voi ombovaipa.

₈Orere emoĩ eme oreramoĩ kuery ojejavyague.

Ha'e rami 'rãgue py orea py eju pojava oremboaxy aguã,

noronhanimavei ma ramo.

₉Oreruete orereraa jepea, orepytyvõ ke

nderery remboete ukaa rupi vy.

Orereraa jepe, ha'e emboguepa rojejavyague

nderery re ae vy.

₁₀Mba'erã tu yvy regua kuery “Mamo tu Penderuete oĩ?” he'i okuapy?

Nerembiguai kuery ruguy onhoẽague re

yvy regua rembopaga vy exa uka orevy.

₁₁Endu ke nhuã py ikuai va'e poaẽa.

Ndepo'akaa rupi emoingove ju omano aguã rami ikuai va'e.

₁₂Senhor, orea katy rai ikuai va'e ndere ijayvu vai rei ramo

embopaga sete-kue áryve.

₁₃Ha'e rã ore ma ndevygua orekuai,

nerymba vexa'i kuery remongaru va'e ae.

Roguerovy'a riae 'rã.

Aỹ guive raka'e rã peve roporaei 'rã ndevy.