Salmo 78

₁Xeretarã kuery, pejapyxaka ke xee rombo'e ramo.

Pejapyxaka porã ayvu xejuru gui oẽ va'e re.

₂Xeayvu 'rã mba'emo re ambojojaa rupi.

Amombe'u porã 'rã ymagua kuery 'arandua.

₃Mba'emo nhanderu kuery nhandevy omombe'u rã

nhaendu ha'e jaikuaa va'ekue,

₄ha'e nungakue nanhamombe'u e'ỹi 'rã nhandera'y kuery pe.

Raka'eve rã ikuai va'erã pe voi nhamombe'u 'rã

Senhor opo'akaa rupi opa mba'e porã ojapo va'ekue jarovy'a aguã.

₅Ha'e ae oeja raka'e oayvu Jacó kuery pe,

Israel kuery pe oeja lei.

Ha'e nhaneramoĩ kuery pe ijayvu

gua'y kuery pe ju omombe'u aguã re,

₆ikuai jevy va'e kuery voi oikuaa aguã,

kyrĩgue oiko'i va'erã teri va'e kuery voi.

Ha'e gui ha'e kuery ju opu'ã vy ha'e nungakue re ijayvu aguã guamymino kuery pe,

₇Nhanderuete re ojerovia aguã,

ha'e hexarai e'ỹ aguã Nhanderuete rembiapokue re,

ha'e rami 'rãgue py ojapo uka va'ekue rupi ete ikuai aguã,

₈tamoĩ kuery ikuaiague rami e'ỹ ikuai aguã,

nonhe'ẽ rendui va'e'ỹ ikuai aguã.

Ha'e kuery ma ha'ekue'ỹ-kue'ỹ rami ipy'a va'e,

onhe'ẽ py Nhanderuete pe e'ỹ ikuai raka'e.

₉Efraim ra'y kuery guyrapa reve-reve ikuai raka'e va'eri

onhamba oje'oivy joe opu'ãa ára.

₁₀Ojepe'apa Nhanderuete guexeve guarã ojapo va'ekue gui,

ixuguigua lei rupi nda'ikuaixei vy.

₁₁Hexaraipa okuapy hembiapokue

ha'e opa mba'e porã oexa uka va'ekue gui.

₁₂Nhomondyipaarã tamoĩ kuery renonde ojapo teĩ,

Egito yvy Zoã regua nhuũndy rupi.

₁₃Ye'ẽ omboja'o vy omboaxapa heravy ha'e va'e rupi,

yy omopu'ã imo'amy omboty vy.

₁₄Ara py peteĩ arai ojekuaa va'e rupi ogueraa,

ha'e rã pyávy ma tata hexakãa rupi oguereko.

₁₅Tekoa e'ỹa py itaova ombovo vy

omboy'u pavẽ typy vaipa va'e gui rami.

₁₆Ita gui omoẽ yy oxyry atã va'e,

yakã rami omboxyry.

₁₇Ha'e rami teĩ ha'e kuery ojejavy tema okuapy henonde.

Tekoa e'ỹa py ikuai raka'e Yvate ete va'e rovai.

₁₈Opy'a py Nhanderuete pe “Taexa” he'ia rupi ikuai.

Ho'u va'erã re rive tema ojerure okuapy.

₁₉Nhanderuete re ijayvu vy aipoe'i okuapy:

“Nhanderuete nda'u tekoa e'ỹa py ojou 'rã ja'u va'erã?

₂₀Ita re ombota uka vy ha'e va'e gui yy omboxyry va'ekue

mbojape voi nda'u ome'ẽ kuaa 'rã ja'u va'erã?

Xo'o voi nda'u ojou uka 'rã ojeupegua kuery pe?” he'i okuapy.

₂₁Ha'e nunga Senhor oendu vy ojou vai.

Ha'e rami vy Jacó ra'y kuery re omoendy tata,

Israel kuery pe oexa uka opoxya.

₂₂Mba'eta ha'e kuery ndojeroviai Nhanderuete re,

ndogueroviai guive ogueraa jepe aguã.

₂₃Ha'e rami teĩ yva pe ha'e ijayvu vy

oipe'a uka yva rokẽ.

₂₄Ojapo ha'e kuery áry ho'a aguã maná ho'u aguã.

Ha'e kuery pe ome'ẽ tembi'u yva guigua,

₂₅ha'e ramo peteĩ-teĩ ho'u okuapy mbojape anjo kuery rembi'u regua.

Hevyatãmba aguã rami ombou tembi'u.

₂₆Ha'e gui ojapo yva gui yvytu kuaray oẽa katy gui oipeju aguã rami,

opo'akaa rupi ombou yvytu kuaray puku-a katy gui.

₂₇Ha'e rami vy xo'o ju ombou ha'e kuerya py yvy ku'i rami,

guyra ombou ita ku'i ye'ẽ rembe re oĩ va'e rami heta va'e.

₂₈Ojapo ha'e kuery ikuaia mbyte ho'a aguã rami,

ha'e kuery ro yvýry rupi ae.

₂₉Ha'e ramo ho'u okuapy hevyatãmba peve,

ha'e kuery oipota va'e ojapo ramo.

₃₀Ha'e rami teĩ ha'e kuery nonhandu kuaavei.

Ijuru py tembi'u oime rei teri reve

₃₁Nhanderuete oexa uka opoxya ha'e kuery rovai.

Ha'e kuery regua imbaraetekueve voi ojuka,

oity inony Israel regua kunumigue.

₃₂Ha'e rami rire teĩ ha'e kuery ojejavy riae tema,

ndojeroviai okuapy tembiapo porã ojapo teĩ.

₃₃Ha'e nunga rupi ha'e ojapo ha'e kuery oikovea yvytu rami rive oaxapa vyvoi aguã rami,

oikovea pukukue re okyje reia rupi anho ikuai aguã.

₃₄Ojukapa ta ma ramo mae ma ojapukai okuapy ixupe,

onhemboaxya oendu vy oeka okuapy Nhanderuete.

₃₅Ima'endu'a ju Nhanderuete ha'e kuery pegua itaova oikoa re,

Nhanderuete Yvate ete va'e heraa jepea re.

₃₆Ha'e rami teĩ ixupe ojapukai vy ijayvu porã merami rive okuapy,

oapekũ py ma ijapu.

₃₇Mba'eta opy'a py ndojerovia etei,

guexeve guarã ojapo va'ekue rupi e'ỹ ikuai.

₃₈Ha'e rami teĩ Nhanderuete nhomboaxy va'e vy

omboguepa 'rã teko vai, nanhomombai 'rã guive.

Ha'e rami 'rãgue py mbovykue rei e'ỹ nomoĩ 'rã ipoxy aguã,

opoxya oendu va'eri ndajoguerekoi 'rã ha'e rami.

₃₉Ima'endu'a ha'e kuery to'o rive ikuaia re,

yvytu oaxa rire ndojevyveia rami ikuai va'e ramo.

₄₀Ha'e rami teĩ mbovykue rei e'ỹ hexe opu'ã rei okuapy tekoa e'ỹa py,

ha'e kuery ae'i ikuaia py ombopoxya rupi ikuai.

₄₁Nhanderuete pe “Taexa” he'i jepi,

ijayvu rei okuapy Israel kuery ruete Iky'a e'ỹ va'e re.

₄₂Na'ima'endu'avei okuapy ipo'akaa re,

hovaigua kuery gui ogueraa jepeague re voi,

₄₃neĩ Egito yvy re hexa pyrã ojapoague re,

Zoã regua py nhomondyipaarã ojapoague re.

₄₄Mba'eta ha'e py yakã oĩ va'e tuguy ju ojapo va'ekue,

yy gui ha'e kuery oy'u e'ỹ aguã.

₄₅Ha'e kuerya py ombou heta mberu oixu'upa aguã,

ju'i voi heta ombou omomba aguã.

₄₆Ha'e kuery mba'emo omono'õ 'rã va'ekue omboaxapa yxo rembi'urã,

tuku karu py omomba onhotỹ va'ekue'a.

₄₇Amandau ombou vy omomba va'ekue ha'e kuery uva ty,

ha'e yvyra sicômoro ikuai va'e voi ojukapa yro'y py.

₄₈Amandau py omomba hymba vaka kuery,

ha'e onhemboxi va'e py vexa'i kuery ojuka.

₄₉Ha'e kuery pe oexa uka opoxya,

opa mba'e vai py omoingo axy opoxya rupi,

anjo kuery mba'emo vai rerua pe omboaxa.

₅₀Opoxya rupi ete oiko va'ekue,

ha'e kuery rekovea ndogueraa jepei manoa gui,

ha'e rami 'rãgue py mba'eaxy vaikue pe omboaxa hekovea.

₅₁Ojukapa Egito pygua ra'y kuery jypyguare ha'e javi,

jypygua imbaraetekueve Cam regua.

₅₂Ha'e rã ojeupegua kuery ma oipe'apa vexa'i rami,

vexa'i rami oguereko tekoa e'ỹa rupi.

₅₃Oguereko porã ramo okyjea noendui okuapy.

Ha'e rã hovaigua kuery ma oikepa ye'ẽ py.

₅₄Ogueraa yvy iky'a e'ỹ va'e katy,

yvyty opo'akaa rupi oipe'a va'ekue peve.

₅₅Ha'e kuery renonde gui omoxẽmba ha'e va'e yvy pygua kuery,

ha'e gui ijyvy va'ekue ma Israel kuery peguarã ju omboja'o ukapa,

hoogue py omoingo Israel kuery.

₅₆Ha'e rami teĩ Nhanderuete Yvate ete va'e pe “Taexa” he'i ju okuapy,

hexe opu'ãa rupi.

Ijayvuague rami e'ỹ ikuai.

₅₇Tamoĩ kuery ikuaiague rami ete ojepe'apa,

ojeroviaa rupi ve'ỹ ikuai.

Opa marã rei ikuai guyrapa hembia e'ỹ va'e rami.

₅₈Mba'eta yvy'ã rupi ombojerovia atyrã ojapo vy

ombopoxy,

mba'emo ra'angaa rive omboetea rupi ojapo okuapy nda'evei etea oendu aguã rami.

₅₉Ha'e nunga Nhanderuete oendu vy ipoxy.

Ha'e vy nopenavei Israel kuery re.

₆₀Noĩvei ombojeroviaaty Siló tetã py oĩ va'e py,

avakue mbyte oo'i oĩ atyrã ojapo rire teĩ.

₆₁Lei ryru ipo'akaa kuaa ukaa voi ogueraa uka amboae yvy katy,

hexakãa rexa ukaa oĩ va'ekue guive ngovaigua kuery po py omboaxa.

₆₂Ojeupegua kuery omboaxapa kyxe py ijukaarã pe,

ojeupegua kuery rovai ipoxy vy.

₆₃Ha'e ramo kunumigue tata omomba ramo

kunhataĩgue ogueroporaei va'erã jipoi, neĩ omenda aguã.

₆₄Sacerdote kuery voi kyxe py ojukapaa rã

ta'yxykue ojae'o aguã nda'evei.

₆₅Ha'e gui mae Senhor oikuaa pota okeague gui omyĩ va'e rami,

ipy'a guaxu va'e vinho oy'u vy ojapukai atã va'e rami avi.

₆₆Ha'e vy ngovaigua kuery ojuka vy omboguevi atãmba,

ojapo raka'e rã peve oxĩmba aguã rami.

₆₇Ha'e gui huvixarã ma José ramymino kuery va'e regua ndoiporavoi,

neĩ Efraim regua.

₆₈Ha'e rami 'rãgue py Judá regua oiporavo,

Sião yvyty oayvu va'e guive.

₆₉Ha'e áry ojapo ojeupegua henda iky'a e'ỹ va'e yva rami ete oĩ atã va'erã,

omoĩ atã raka'e rã peve guarã yvy onhono va'ekue rami.

₇₀Ha'e rami vy oiporavo guembiguai Davi

vexa'i kora gui oipe'a vy.

₇₁Vexa'i re opena oikovya gui ogueru vy

omoĩ Jacó kuery re opena va'erã,

ojeupegua kuery Israel re ae.

₇₂Ha'e ramo opena oikovy anhetẽ rupi ipy'a va'e vy,

arandu rupi ete oguereko opo py.