Salmo 77

₁Nhanderuete pe amonhendu xeayvua, ixupe ajapukai guive.

Amonhendu 'rã xeayvua Nhanderuete pe xere oikuaa pota aguã.

₂Xee ajexavai ára nhavõ aeka Senhor.

Pytũ mbukukue re aupi xepo xekane'õ e'ỹ re,

xenhe'ẽ py nanhembovy'a ukaxei vy.

₃Nhanderuete re xema'endu'a vy xepoaẽ ainy.

Mba'emo re aikuaa pota ramo xenhe'ẽ na'imbaraetevei.

₄Ndee rejapo ake aguã xerexa nambotyvei aguã rami,

ajexavai ete rã xeayvu aguã voi nda'evevei.

₅Aikuaa pota ymave guare re,

xema'endu'a ymave rupi ma'etỹa oaxa va'ekue re.

₆Pyávy ma aikuaa pota xepy'a py,

ha'e rami vy xenhe'ẽ py aporandu:

₇“Raka'e rã peve 'rã nda'u Senhor nopenavei?

Ndoexa ukavei 'rã nhanemboaxya?

₈Opa ete ma nda'u iporayvua?

Ijayvuague voi nda'u oaxa rive 'rã raka'eve rã peve?

₉Nhanderuete hexarai ma teve joayvua gui?

Tyrã ipoxy vy teve ndoexa ukavei nhanemboaxya?”

₁₀Aipoa'eve ju:

“Pova'e aroangeko aikovy,

mba'eta Yvate ete va'e oiporu kuaa regua oiporuaty rami ve'ỹ oiporu”, ha'e va'ekue.

₁₁Xema'endu'a Senhor rembiapokue re,

mba'emo porã ymave rupi rejapo va'ekue re xema'endu'a aikovy.

₁₂Aikuaa pota nerembiapokue ha'e javi re,

xema'endu'a nhomondyipaarã rejapo va'ekue re.

₁₃Xeruete, ndee reikoa ma peteĩ tape iky'a e'ỹ va'e.

Marã ramigua tuuete nda'u ndee Oreruete rami ipo'aka 'rã?

₁₄Ndee ma Oreruete nhomondyipaarã rejapo va'e.

Yvy regua kuery pe rexa uka ndepo'akaa.

₁₅Ndejyva py reraa jepe va'ekue ndevygua kuery,

Jacó ha'e José ramymino kuery.

₁₆Ha'e gui Oreruete, yy nderexa. Yy nderexa vy okyjea oendu raka'e.

Typya voi omyĩmba.

₁₇Arai inhana va'e ojeapo yy.

Yva re yapu atã onhendu.

Ha'e gui hu'y voi oaxa jekuaa joa katy e'ỹ-e'ỹ.

₁₈Ndeguigua yapua hi'ãgue-'ãgue nhendu opa rupi,

overa va'e voi omoexakã ovy yvy re.

Yvy omyĩ vy oryryi.

₁₉Ye'ẽ rupi nderape ojekuaa,

repyrõa ma yy tuvixa va'e rupi oo.

Ha'e rami teĩ ndepypo ete ndojekuaai.

₂₀Ndevygua kuery rereko va'ekue vexa'i rami,

Moisés ha'e Arão po rupi.