Salmo 76

₁Nhanderuete reko ma Judá yvy re oikuaapy,

hery ma omboetepy Israel kuerya py.

₂Salém tetã py oĩ ombojeroviaaty,

Sião ma oĩaty ete.

₃Ha'e py omopẽmba hu'y rexakãgue,

hu'y jokoa, kyxe ha'e joe opu'ã va'e ha'e javi.

₄Ndee ma yvate ete ha'e ipo'akapave va'e

yvyty imarã e'ỹ va'e gui voi.

₅Ipy'a guaxukueve gui reipe'apa imba'e rei-rei.

Ha'e kuery okepa ma oupy,

peteĩve ojerovia vai va'ekue ndoiporuvei 'rã opo.

₆Ndee Jacó Ruete, ndeayvu atã ramo

opytapa karóxa joe opu'ãa pygua ha'e kavaju.

₇Anhetẽ ndee ma nhomongyjea reiko.

Ndepoxy ramo mava'e 'rã tu opyta nerenonde py?

₈Yva guive rendu uka ndeayvua.

Yvy jave rupi oryryi ha'e okyrirĩmba okuapy

₉Nhanderuete opu'ã ramo nhomboayvu aguã

ha'e yvyĩgueve'i ogueraa jepe aguã.

₁₀Mba'eta avakue poxya voi rejapo 'rã ndereroporaeia aguã rami,

ha'e gui poxya mboae ma ndejee ae 'rã remoĩ.

₁₁Senhor Penderuete pe penhemboayvu vy pejapo ete.

Ijyvýry pendekuai va'e peru peme'ẽ va'erã,

mba'eta nhomongyjea oiko.

₁₂Ha'e ma omomba 'rã huvixa kuery ojejou porãa.

Ixugui huvixa yvy regua okyjepa 'rã okuapy.