Salmo 75

₁Oreruete, roguerovy'a.

Roguerovy'a, rojapukai 'rã nderery rupi,

ha'e roikuaa ukapa 'rã nerembiapo porãa.

₂Mba'eta aipo're: “Xee ma ambojeupity 'rã ára aa'angaague

ha'evea rupi anhomboayvu aguã.

₃Yvy omyĩmba, hexe ikuai va'e ha'e javi guive.

Ha'e rami teĩ xee amoĩ atãve 'rã ijytarã.

₄Aipoa'e ojee ae ojerovia va'e pe: ‘Penhemboyvate eme.’

Ha'e opa marã rei ikuai va'e pe voi: ‘Peropu'ã eme penembaraetea.

₅Peropu'ã rive eme penembaraetea pendeyvatea py,

pendeayvu vaikue eme guive itaova aiko va'e re.’ ”

₆Mba'eta kuaray oua katy gui e'ỹ ou nhanepytyvõarã,

kuaray oikea katy e'ỹ, neĩ tekoa e'ỹa gui e'ỹ guive.

₇Nhanderuete ae joe oikuaa pota va'erã oiko.

Amongue ma ha'e omomba 'rã,

ha'e rã amboae kuery ma omboyvate 'rã.

₈Mba'eta Senhor po py ma oĩ peteĩ karo.

Ha'e va'e py ma oĩ vinho yjui va'e opa marãgua re omoirũ mbyre.

Ha'e va'e gui ome'ẽ 'rã oy'ua aguã.

Ha'e ramo heko vai va'e yvy re ikuai va'e ha'e javi

oy'upa 'rã iky'akue reve.

₉Ha'e rã xee ma raka'e rã peve 'rã aroporaei.

Arovy'aa rupi aporaei 'rã Jacó Ruete pe.

₁₀Amomba 'rã heko vai va'e mbaraetea.

Ha'e rã heko porã va'e mbaraetea ma omboyvatea 'rã.