Salmo 74

₁Oreruete, mba'e re tu orereja raka'e rã peve?

Mba'e re tu ndepoxy nerymba vexa'i kuery ndeyvy regua ae orekuai va'e pe?

₂Nema'endu'a ke ndevygua orekuai va'e re,

yvy itui ypy'i guive ndejeupe guarã orejogua rire.

Orejogua raka'e ndevy guarã orekuai aguã.

Nema'endu'a ke Sião yvyty py reikoague re.

₃Eju ke ndevygua oo ivaipa are ma va'e py,

henda iky'a e'ỹ va'e nderovaigua kuery opa marã omongy'apaague py.

₄Mba'eta ronhemboatyague py nderovaigua kuery hevovo rei okuapy,

ha'e ojeupegua ra'angaa rive ju omopu'ã imo'amy.

₅Ha'e kuery ma ka'aguy re haxa oiporu va'e rami avi ombovaipa.

₆Ha'e gui aỹ yvyrape ombojegua pyre ha'e javi

ha'e kuery omopẽmba va'ekue haxa ha'e karavo mbotaa py.

₇Ndevygua henda iky'a e'ỹ va'e re omboja tata,

yvy peve oapy aguã nderery oĩague.

₈Ha'e kuery opy'a py “Aỹ ma nhamomba vyvoi”, he'i okuapy.

Ha'e rami vy oreyvy jave re oapypa Nhanderuete pegua henda iky'a e'ỹ va'ekue ha'e javi.

₉Ha'e rami rire ndoroexavei ma orevy guarã oikuaa uka pyre.

Jipovei ma profeta,

orembyte ndoikoi guive raka'e peve 'rã paa oikuaa va'erã.

₁₀Oreruete, raka'e peve 'rã tu nderovaigua kuery orere opu'ã rei?

Raka'e peve nda'u nderovaigua kuery ijayvu vaikue rei 'rã nderery re?

₁₁Mba'e re tu ndereupivei ri ndepo reiporu kuaa regua,

ndepexo yvýry remboapu'a va'ekue?

₁₂Ha'e gui Xeruete Xeruvixave ma yvy itui ypy'i guive oiko.

Ha'e ae ojapo raka'e oo jepe aguã rami yvy mbyte.

₁₃Ndee ma ndepo'akaa rupi remboja'o raka'e ye'ẽ.

Ha'e gui yy re ae ju remou'ũ va'ekue ypo akã,

₁₄jakare akã rembovopa,

ha'e hetekue reme'ẽ vixo tekoa e'ỹa rupigua ho'u aguã.

₁₅Ndee reipe'a va'ekue yvurã ha'e yakã ikuai va'erã,

ha'e rã yakã guaxu ma remboypa va'ekue.

₁₆Ára ha'e pytũ voi ndevygua.

Jaxy ha'e kuaray guive ndee rejapo va'ekue meme.

₁₇Remoĩ avi yvy apy peve guarã.

Kuaray puku-a ha'e yro'ya ndee ae rejapo va'ekue.

₁₈Eikuaa pota ke pova'e nunga re:

ndee Senhor re nderovaigua kuery ijayvu rei okuapy,

hi'arandu e'ỹ va'e regua ijayvu vaikue-ikue nderery re.

₁₉Emboaxa eme nerymba pyku'i kuery ho'u va'erã pe,

nderexarai eme ndevygua kuery rojexavai rokuapy va'e re.

₂₀Nema'endu'a ke ndereve guarã rejapo va'ekue re,

mba'eta yvy re nda'evei etea py heko vai va'e anho ikuai.

₂₁Ojexavai va'e toxĩmba rei eme.

Ojexavai va'e ha'e iporiaukue'i togueroporaei nho nderery.

₂₂Xeruete, epu'ã ke, eikuaa uka porã ndereko.

Nema'endu'a heko vai va'e ko'ẽ nhavõ nembojaru reia re.

₂₃Nderexarai eme nderovaigua kuery ojapukai rei okuapya re,

mba'eta nderovaigua kuery opa marã ijayvuve tema okuapy.