Salmo 73

₁Nhanderuete anhetẽ Israel kuery oayvua rupi ete oiko,

ipy'a ky'a e'ỹ va'e kuery pe.

₂Ha'e rã xee ma aikoa rupi ajavy rai,

kyrĩ'i oata ajavy aguã aguataa py.

₃Mba'eta xee ma amoaruã va'ekue ojee rive ojerovia va'e kuery,

opa marã rei ikuai va'e imba'e rei-reipa rã aexa vy.

₄Ha'e kuery re noĩ ipy'a eta reia merami.

Hete rexaĩ, imbaraete rei guive.

₅Ha'e kuery ma avakue imarã va'e rami e'ỹ na'ikane'õi,

neĩ ndojexavai 'rã avakue mboae rami e'ỹ.

₆Ojee omoĩ 'rã ojejou porã reia mbo'y rami,

jojukaxea omoĩ 'rã ao puku rami.

₇Ikyra ete gui hexa ẽmba rei 'rã,

ha'e ipy'a re ma opa marã rei ikuai aguã anho oĩ.

₈Nhombojaru rei ha'e ijayvu vai rei 'rã okuapy joe,

nhomoingo axy rei aguã re anho 'rã ijayvu onhemboyvate vy.

₉Yva pygua gui onhemboyvateve aguã re tema ijayvu 'rã okuapy,

yvy jave re ikuai va'e re ijayvu.

₁₀Ha'e nunga rupi heta va'e kuery oje'oi 'rã hupive,

yvu gui oy'uxea rami oy'u va'e rami.

₁₁Aipoe'i 'rã: “Mba'exa nda'u Nhanderuete oikuaa 'rã?

Xapy'a rei nda'u Yvate ete va'e re oĩ ri oikuaa aguã?” he'i.

₁₂Ha'e rami ae ikuai heko vai va'e.

Ha'e kuery noĩ vai 'rãe,

omba'e rei-reirã ojou-jouve 'rã.

₁₃Ha'e nunga rupi xepy'a ky'a e'ỹa rupi aikoa mba'everã ndovarei,

neĩ xepo ky'a e'ỹa guive.

₁₄Mba'e re tu aiko axy riae

ko'ẽ nhavõ xembopagaa rupi?

₁₅Ha'e rami xeayvu va'e rire

ajapo 'rãgue ndera'y kuery ha'e javive pe nda'evei aguã rami.

₁₆Ha'e rami avi ha'e nunga re aikuaa pota vy

xevy pe ipoyi ete va'e aikuaa,

₁₇Nhanderuete pegua henda iky'a e'ỹ va'e py aike peve.

Ha'e gui mae ma aikuaa ha'e kuery opa aguã.

₁₈Anhetẽ ndee remoĩ 'rã ha'e kuery yxyĩ reia py,

rejapo 'rã ho'apa vy okanhy aguã rami.

₁₉Opa xapy'a 'rã,

nhemondyi gui rive 'rã okanhymba.

₂₀Oexa ra'ua gui oma'ẽ xapy'a va'e rami 'rã

ndee voi Senhor repu'ã vy ha'e kuery re nerema'ẽvei.

₂₁Ha'e gui xepy'a raxy jave,

xekuraxõ py nda'evei reia anho aendu vy

₂₂xevai rei aikovy va'ekue aikuaa e'ỹ vy.

Nerenonde hi'arandu e'ỹ va'e rami aiko va'ekue.

₂₃Ha'e rami avi ndereve riae xee aiko,

ndee ma xepo aiporu kuaa regua re xejopy.

₂₄Ndee xerereko 'rã xemongetaa rupi.

Ha'e rire ma xemovaẽ 'rã nerexakãa py.

₂₅Mava'e 'rã tu areko yva re ndee e'ỹ vy?

Yvy re voi ndoikoi ndee rami arovy'a va'e.

₂₆Xero'o, xekuraxõ ikangypa teĩ

Nhanderuete oiko xepy'a mombaraetearã,

xevygua oĩ raka'e rã peve guarã.

₂₇Ndegui ojepe'a va'e ma okanhymba 'rã,

remomba 'rã ndere ojeroviaague rupi ve'ỹ ikuai va'e.

₂₈Ha'e rã xevy ma ha'eve vaipa Nhanderuete reve aikoa.

Senhor Nhanderuete re anhemi,

hembiapokue ha'e javi amombe'upa aguã.