Salmo 72

₁Oreruete, huvixave re emoĩ ke ne'arandua,

huvixave ra'y guive emo'arandu joguereko porã aguã rami.

₂Ha'evea rami meme toikuaa pota ndevygua kuery re,

teko porã rupi topena ojexavai rei'i va'e re.

₃Yvyty ikuai va'e gui ou 'rã heta va'e kuery moingo porãarã,

yvy'ã gui voi ou 'rã teko porã.

₄Ha'e gui huvixa toikuaa pota heta va'e kuery iporiaukue'i re,

toepy ojexavai va'e ra'y kuery,

ha'e rã nhomoingo axyare ma tomou'ũmba.

₅Ha'e ma oiko riae 'rã kuaray hexakã teria ja,

jaxy hexakãa ja guive, yvy regua ha'e javi okuavea ja.

₆Huvixa toiko nhuũndy rupi oky ho'a va'e rami,

oky xapy'a pyávy yvy omoakỹ va'e rami.

₇Ha'e oĩa ára heko porã va'e ta'ikuai porã,

jaxy hexakã teria ja toiko ikuai porã aguã.

₈Ta'ipo'aka ye'ẽ ha'e javi peve,

ha'e yakã oĩ va'e guive yvy apy peve.

₉Henonde toĩ tekoa e'ỹa regua kuery ha'e javi guenapy'ã re.

Hovaigua kuery tojero'apa yvy ku'i oere peve.

₁₀Ixupe Társis tetã ha'e yy pa'ũ pygua huvixa kuery tome'ẽ imposto repy,

Sabá ha'e Sebá pygua huvixa voi tome'ẽ mba'emo ixupe.

₁₁Henonde huvixave ikuai va'e toĩmba guenapy'ã re.

Ha'e javi regua ta'ikuai ixupe anho.

₁₂Mba'eta ha'e ma oepy 'rã iporiaukue'i ojapukai ramo,

ojexavai va'e ha'e yvyĩgue'i guive.

₁₃Omboaxy 'rã ikangy'i ha'e ojexavai va'e,

ogueraa jepe 'rã iporiaukue'i rekove.

₁₄Ojogua 'rã omoingo axy rei pyre ha'e ojuka pyrã rekove.

Ixupe rã ha'e kuery ruguy hepyve ete.

₁₅Toikove puku,

ha'e gui ixupe ome'ẽa 'rã ouro Sabá guigua.

Hexe ojerurea riae 'rã,

ima'endu'a porãa 'rã guive ko'ẽ nhavõ.

₁₆Ijyvy re toiko porã mba'emo aju,

tomyĩmba jekuaa yvyty apyte peve.

Tai'a porã Líbano yvy pygua rami.

Tetã pygua kuery voi taetave ovy jai ipotya rami.

₁₇Hery re ta'ima'endu'aa riae raka'e rã peve,

ta'ima'endu'a porãa kuaray hexakã teria ja.

Hexe vy toiko porã ha'e javi regua avakue,

ixupe yvy regua kuery “Ima'endu'a porãmby” te'i.

₁₈Ima'endu'a porãmby toiko Senhor Nhanderuete, Israel kuery Ruete,

ha'e anho nhomondyipaarã ojapo kuaa va'e ramo.

₁₉Ta'ima'endu'a porãa riae hery re, iporã ete ramo.

Hexakãa tojekuaa yvy jave re.

Amém! Amém!

₂₀Opa ma Jessé ra'y Davi onhembo'ea.