Salmo 71

₁Senhor, ndere ae xee anhemi va'e.

Taiko eme oxĩmba rei va'e.

₂Xereraa jepe rejoguereko porãa rupi vy, xejogua ju.

Endu ke ndeapyxa py, ha'e xerepy.

₃Ndee ma xe'itaova anhemiaty.

Ndeayvu aa jepe aguã re,

mba'eta ndee ma xe'itaova ha'e oo imbaraete va'e.

₄Xeruete, xereraa jepe ke heko vai va'e po gui,

avakue heko vai va'e, porayvu e'ỹ va'e xejopy va'e gui.

₅Mba'eta Senhor Xeruete, ndee ma roarõ aikovy va'e,

xekunumi guive ndere ajerovia va'e.

₆Ndere ae ajeko va'e xetui'i guive.

Xeryru'i gui xepe'a va'ekue.

Ha'e gui ndere vy 'rãe aporaei ára nhavõ.

₇Heta pe nhomondyipaa aiko,

teĩ ndee ma anhemiaty imbaraete va'e reiko.

₈Ndevy anho 'rã aporaei,

roguerovy'a 'rã ára nhavõ.

₉Xetuja'i ma teĩ xereja eme xee ae'i.

Xembaraetea opa ramo xerepy e'ỹ eme.

₁₀Mba'eta xerovaigua kuery ma ijayvu okuapy xere.

Xerekovea oipe'axe va'e nhomboaty tema okuapy.

₁₁Ha'e vy aipoe'i: “Nhanderuete ndoepyvei ma 'rã.

Nhamonha ke, jajopy,

heraa jepearã ndoikoi ramo”, he'i okuapy.

₁₂Xeruete, ejepe'a eme xea gui.

Xeruete, ejapura ke xerepy aguã.

₁₃Ha'e rã xerekovea rovaigua kuery ma toxĩmba ha'e tokanhymba.

Ejapo ke xemoĩ vaixe va'e kuery ae oxĩmba aguã rami,

omboeteve e'ỹpy ta'ikuai.

₁₄Ha'e rã xee ma ndee ae roarõ ára nhavõ,

rogueroporaei riae guive.

₁₅Xejuru py amombe'u 'rã rejoguereko porãa,

ára nhavõ amombe'u 'rã rejogueraa jepea,

ndaikuaapai teĩ.

₁₆Anhenhandu Senhor Xeruete mbaraetea rupi.

Ha'e rami vy xema'endu'a jepi 'rã rejoguereko porãa re,

ndeguigua re anho.

₁₇Xeruete, ndee ma xekunumi guive xerekombo'e reikovy.

Ha'e gui aỹ peve amombe'u aikovy iporã ete va'e rejapo va'ekue.

₁₈Ha'e nunga rupi Xeruete, xereja eme,

xetuja'i ete ma, xe'a xiĩmba ma teĩ,

aỹgua kuery pe nembaraetea aikuaa ukapa peve,

ndepo'akaa guive raka'e rã ikuai va'erã pe.

₁₉Xeruete, ndereko porãa ma yva peve 'rã oo.

Mba'emo vaipa ete rejapo va'e, Xeruete.

Mava'e nda'u ndee ramigua ete 'rã oiko?

₂₀Opa marãgua teko vai ha'e jexavaia rupi xemboaxa rire teĩ

xerekovea remoĩ porã jevy 'rã,

yvykua vaikue gui xerenoẽ kuerei.

₂₁Xemoingo porã jevy ke,

xemombaraete ju.

₂₂Xee voi mbaraka py rogueroporaei 'rã.

Xeruete, xema'endu'a 'rã ndeguigua anhetẽ va'e re.

Ndevy aporaei 'rã mboraei ixã reta va'e pu rupi,

Israel kuery ruete Iky'a e'ỹ va'e pe ae.

₂₃Roguerovy'aa rupi xejuru py aroporaei 'rã,

xerekovea rupi voi roguerovy'a 'rã, xereraa jepe rire.

₂₄Xeapekũ py ára nhavõ aroma'endu'a 'rã rejoguereko porãa,

mba'eta xemoĩ vaixe va'e oxĩmba ha'e nda'evei nho okuapy.