Salmo 69

₁Xeruete, xereraa jepe ke,

mba'eta yy ou ma xerekovea peve.

₂Xepija ma yapo py,

yvy ndarovyi.

Yy typyvea py aĩ.

Oxyry atã vy xemoinge.

₃Ajapukai riae ete vy xekane'õ ma,

xejyryvi pirupa ma guive.

Xerexa voi ndoexavei ma,

Xeruete arõ riae ete rã.

₄Mba'e py e'ỹ ndaxerayvui va'e kuery ma

xe'a xeakã regua gui hetave ikuai.

Xemombaxe va'e kuery ma ipo'aka va'e meme,

mba'e py e'ỹ xerovaigua kuery xere opu'ã va'e.

Ha'e rami vy xeapo okuapy xemonda ague'ỹ voi ame'ẽ ju aguã rami.

₅Xeruete, ndee reikuaa porã xee ae 'arandua rupi e'ỹ aikoague,

atekoavyague ndereikuaa e'ỹi.

₆Senhor, Xeruete nexondaro reta va'e,

xekáuxa toxĩmba eme ndere ojerovia va'e.

Israel kuery Ruete,

xekáuxa toĩ vai eme ndereka va'e kuery.

₇Mba'eta ndevy aiko ramo xere ijayvua vaikue-ikue.

Xerova re axĩmbaa anho ojekuaa.

₈Xeryvy kuery rexaaty rami ve'ỹ ma aiko,

ha'i pi'a kuery voi ndaxerexa kuaavei ma.

₉Mba'eta ndevygua oo ayvu etea xemomba,

ndere ijayvu rei va'e kuery ijayvu reia ma xere ae ou.

₁₀Ajae'o akaru e'ỹ re aikoa py.

Ha'e rami aikoa re ju ijayvua.

₁₁Ajukue voxa guigua py anhemonde ramo

ha'e kuery xembojaru rei rive 'rã okuapy.

₁₂Okẽ py oguapy va'e opuka rei okuapy xere.

Oka'u rei va'e kuery voi xerery rupi oporaei 'rã okuapy.

₁₃Ha'e rã Senhor, xee ma ndevy anhembo'e ha'eve jave.

Xembovai ke Xeruete, opa mba'e py renhomboaxya rupi,

mba'eta ojeroviapy reiko vy renhopytyvõ 'rã.

₁₄Xereraa jepe ke ijaxuru va'e py aike e'ỹ aguã.

Xereraa jepe xere ija'e e'ỹ va'e kuery gui,

yy typyvea py aikeague gui.

₁₅Xereroxyry uka eme yy oxyry atã va'e pe,

yy jere py guive xemoinge uka eme,

yvykua voi xe'áry tonhemboty eme.

₁₆Senhor, xembovai ke renhomboaxya rupi rejoayvu va'e vy.

Opa mba'e py renhomboaxy va'e vy ejevy ju xea py.

₁₇Xee nerembiguai pe ejexa uka e'ỹ eme,

ajexavai aikovy ramo.

Xembovai voi ke.

₁₈Enhemboja xerekovea re, xerepy,

xereraa jepe xerovaigua kuery gui.

₁₉Ndee ma reikuaa ae xembojaru rei okuapya,

xemoxĩmbaa ha'e xemoĩ vai reia guive.

Xerovaigua kuery ha'e javi rexaa rupi meme ikuai.

₂₀Axĩmbaa gui xepy'a ovopa, xekangy vy.

Xemboaxyarã ma arõ rive,

xembovy'aarã aeka teĩ ndajoui.

₂₁Ha'u va'erã iro va'e rive ome'ẽa xevy,

ha'e xey'uvei ramo vinagre ome'ẽa.

₂₂Ha'e kuery mesa tojeapo nhuã rami ha'e kuery renonde,

imba'e rei-rei topyta imbo'aarã.

₂₃Ha'e kuery rexa voi tapytũmba ndoexavei aguã,

ikupe ma ejapo oryryipa aguã rami.

₂₄Ha'e kuery pe exa uka ndepoxya,

ndepoxya toupitypa.

₂₅Hekoa topyta tekoa e'ỹa rami,

avave rei toiko eme hoogue py.

₂₆Mba'eta ha'e kuery omoingo axy raxave rire ndee remoingo axy va'e,

ndee remboguai va'ekue ha'e kuery ojapo haxy oendu vaipave aguã rami.

₂₇Ha'e kuery re emoĩve tema teko vai káuxa opaga aguã,

remboaxy aguã rami e'ỹ ikuai aguã.

₂₈Hery emboguepa kuaxia tekove oguereko va'e kuery rery oĩa gui,

toĩve eme heko porã va'e kuery rery reve.

₂₉Ha'e rã xee ma ndavy'ai ete aikovy ajexavai vy.

Xeruete anhemiaty yvate va'e, exa uka ju xereraa jepea.

₃₀Nhanderuete rery rupi aporaei 'rã,

amboete 'rã arovy'a reve.

₃₁Namigua ma Senhor ojou porãve 'rã

vaka ra'y, e'ỹ vy vaka hakua ha'e ipyapẽ va'e ome'ẽmby gui.

₃₂Ha'e va'e ojexavai va'e kuery oexa vy ovy'a 'rã okuapy.

Peẽ Nhanderuete re penema'endu'a va'e,

tapendeky'a guaxuve ju.

₃₃Mba'eta Nhanderuete ombovai 'rã iporiaukue'i ojapukaia,

ndaexarai 'rã nhuã py ixupegua omboty pyre gui.

₃₄Ha'e gui yva ha'e yvy regua, toporaei ixupe,

ye'ẽ ha'e opa mba'e hexe omyĩ va'e avi.

₃₅Mba'eta Nhanderuete ogueraa jepe 'rã Sião pygua kuery,

ojapo ukapa ju 'rã guive Judá yvy regua tetã.

Ha'e py ma ha'e kuery hekoa ju 'rã, ixupegua ae 'rã ikuai.

₃₆Ha'e gui hembiguai ramymino kuery ju 'rã ikuai porã ha'e py,

hery oayvu va'e kuery ikuai avi 'rã ha'e py.