Salmo 68

₁Nhanderuete opu'ã vy omoaĩmba ngovaigua kuery.

Henonde gui onhamba oayvu e'ỹ va'e.

₂Hataxĩ oaĩmba ovya rami ndee remoaĩ 'rã.

Tata gui ei raity hykupaa rami avi

heko vai va'e kuery okanhymba 'rã Nhanderuete renonde gui.

₃Ha'e rã heko porã va'e ma ovy'a 'rã okuapy,

Nhanderuete renonde oporaei 'rã.

Oguerovy'a pavẽ 'rã.

₄Peporaei ke Nhanderuete pe, hery rupi peporaei.

Pemboete arai áry rupi oiko va'e.

Senhor ae hery. Pevy'a henonde.

₅Ha'e ma tyre'ỹ ikuai va'e ru, ha'e imeve'ỹ va'e re oikuaa pota va'e oiko.

Nhanderuete oiko o'amba iky'a e'ỹ va'e py.

₆Nhanderuete ojapo 'rã amongue ha'e ae'i oiko va'ekue ngoo pygua heta reve ju oiko aguã rami.

Nhuã py omboty pyre voi ogueraa jepe 'rã ikuai porã aguã py.

Onhe'ẽ rendu e'ỹ va'e kuery anho 'rã ikuai yvy porã e'ỹa re.

₇Oreruete, ndevygua kuery renonde reẽ reovy ramo,

tekoa e'ỹa rupi reroguata ramo

₈yvy oryryipa raka'e,

yva voi otykypa ndee Oreruete renonde.

Sinai yvyty voi omyĩmba ndee ore Israel kuery Ruete renonde.

₉Oreruete, oky ja'ea rembou ndeyvy re.

Na'iporãvei ramo rembopyau.

₁₀Ha'e py ma ikuai nerymba kuery.

Oreruete, oikotevẽ va'e pe rejou uka mba'emo ndeporayvua rupi.

₁₁Senhor ae oikuaa uka ayvu.

Heta ete ikuai kunhague ayvu porã mombe'ua.

₁₂Huvixave kuery onhamba, oxondaro kuery reve ojavapa,

ha'e gui imba'e rei-rei va'ekue ma kunha hoo va'e ju omboja'o.

₁₃Mba'e re tu pepytu'u peiny mymba kora yvýry?

Apykaxu pepo ma prata py onhovãmbaa mbyre,

hague ipukuve va'e re ma ouro rexakã oĩ.

₁₄Ha'e py Ipo'akapa va'e huvixave kuery omoaĩmba jave

Zalmom yvyty áry ho'a yro'y apĩ.

₁₅Nhanderuete pegua yvyty ma Basã,

yvy'ã yvateve va'e ma Basã regua yvyty.

₁₆Ha'e gui ndee yvyty yvateve va'e,

mba'e re tu remoaruã reia rupi rema'ẽ yvyty Nhanderuete oiporavo va'ekue re?

Ha'e py ma Senhor oiko 'rã raka'e rã peve.

₁₇Nhanderuete pegua karóxa joe opu'ãa pygua ma vinte mil ikuai,

tá, mbovy rei e'ỹ oguereko.

Ha'e va'e kuery mbyte rupi Senhor oiko.

Sinai yvyty ojeapo henda iky'a e'ỹ va'e rami.

₁₈Yvate katy reo ju vy reraa nerembiguairã rejopy va'ekue.

Rejopy avakue ndejeupe guarã, heko vai va'ekue guive,

Senhor Oreruete, ha'e kuery mbyte reiko aguã.

₁₉Ima'endu'a porãmby toiko Senhor ko'ẽ nhavõ nhandevoyi ogueraa va'e.

Nhanderuete ma nhanderepya oiko.

₂₀Nhanderuete ma jogueraa jepea.

Nhanderuete Senhor reve vy jaa jepe 'rã manoa gui.

₂₁Mba'eta Nhanderuete ombovo ngovaigua kuery akã,

hi'a vuku va'e ha'e kuery ae oipotaa rupi ikuai va'ekue akã ombovopa.

₂₂Senhor aipoe'i: “Basã yvy gui arojevy uka ju 'rã ha'e kuery,

ye'ẽ typyvea peve ojava teĩ ha'e gui aru rukapa ju 'rã”, he'i.

₂₃Ha'e ramo pepyrõ 'rã penderovaigua kuery ruguy re,

ha'e penerymba jagua kuery oy'upa 'rã.

₂₄Xeruete, ojekuaa ndevygua kuery hyxy ovy va'e.

Xeruete, Xeruvixave pegua hyxy jogueravy vy oike henda iky'a e'ỹ va'e py.

₂₅Henonde ma oje'oi oporaei va'e,

hakykue ma ixã va'e mbopua kuery oje'oi.

Mbyte rupi ma kunhataĩgue oparã'i va'e revegua ou.

₂₆Teta mbyte penema'endu'a porã ke Nhanderuete re.

Peẽ Israel ramymino kuery, penema'endu'a porã Senhor re.

₂₇Pe py ma oĩ kyrĩve va'e Benjamim regua, amboae kuery renonde re oo,

ha'e Judá regua huvixa kuery ngupivegua kuery reve.

Ou avi huvixa kuery Zebulom ha'e Naftali regua.

₂₈Oreruete, exa uka ju ke nembaraetea,

mbaraete marã e'ỹ orerepya rupi reiporu va'ekue,

₂₉Jerusalém tetã py ndevygua templo guigua.

Huvixa kuery ome'ẽ 'rã mba'emo nemboetea rupi.

₃₀Emondyipa vixo takuaty rupigua,

heta regua kuery guive vaka rami imbaraete teĩ,

ha'e gui amboae regua vaka ra'y rami ikuai va'e.

Epyrõ prata oipota rei va'e kuery re.

Emoaĩmba joe opu'ãxe vai va'e.

₃₁Huvixa kuery ou Egito yvy gui,

Etiópia pygua avi onha 'rã jogueruvy,

opo tynyẽ va'e omokuave'ẽ reve Nhanderuete pe.

₃₂Yvy regua pendekuai va'e, peporaei Nhanderuete pe,

peroporaei Senhor.

₃₃Ha'e ma yva áryve rupi oĩ, yva ymave guare áry rupi.

Ha'e ojapo 'rã ijayvua oendua aguã rami,

ijayvua ipo'akapa ramo.

₃₄Peroporaei Nhanderuete Israel áry rupi ipo'akaa oexa uka va'e,

ombaraetea oexa uka arai yvatevegua re.

₃₅Oreruete, omboetevepy reiko ndevygua henda iky'a e'ỹ va'e py.

Israel kuery Ruete omombaraete ha'e ombopo'aka 'rã ojeupegua kuery.

Ima'endu'a porãmby toiko Nhanderuete!