Salmo 62

₁Nhanderuete anho arõ aikovy xenhe'ẽ py, xeayvu e'ỹ re.

Mba'eta ixugui ae ou xereraa jepearã.

₂Ha'e anho oiko itaova,

xereraa jepea ha'e anhemiaty yvate va'e.

Ha'e nunga rupi ndaxereityai 'rã.

₃Peẽ kuery ha'e javive, raka'e peve tu xee peteĩ ava re pepu'ã rei 'rã xereity aguã

oo mbotya ojero'a va'e, e'ỹ vy kora ho'a rai'i va'e rami.

₄Ha'e va'e kuery xereityxe okuapy naxemboeteavei aguã.

Apu rive ha'e kuery ojou porãve.

Ojuru py ijayvu porã teĩ

opy'a py ma ijayvu vaikue-ikue 'rã.

₅Nhanderuete anho xenhe'ẽ py arõ aikovy xeayvu e'ỹ re,

mba'eta ixugui ou 'rã arõ aikovy va'e.

₆Ha'e anho oiko itaova aĩ aguã,

xereraa jepea, anhemiaty yvate va'e.

Ha'e ramo ndaxereityavei 'rã.

₇Nhanderuete gui ae ou aa jepe aguã ha'e xemboetea aguã.

Nhanderuete re oĩ xembaraete aguã ha'e itaova anhemiaty.

₈Xerevegua kuery, pejerovia hexe ára nhavõ.

Ixupe pemombe'u guive pendepy'a re oĩ va'e ha'e javi.

Nhanderuete ma nhanhemiaty oiko.

₉Avakue yvyĩgue'i ma mba'e'ỹ ikuai,

ijyvatekueve voi anhetẽ rupigua e'ỹ meme ikuai.

Mba'emo opejaa py ipoyia oexaa rã

ha'e kuery ha'e javi teĩ mba'e'ỹ va'e gui nda'ipoyive 'rã.

₁₀Pejerovia eme pejokorea re,

neĩ penemondaa re pevy'a eme guive.

Penemba'e rei-rei hetave ovy teĩ

ha'e nunga re rive pejerovia eme pendepy'a py.

₁₁Peteĩgue Nhanderuete ijayvu, mokoĩguea ma aendu pova'e:

Po'akaa ma Nhanderuete guigua meme.

₁₂Senhor, ndere anho oĩ oremboaxy aguã.

Peteĩ-teĩ pe reme'ẽ 'rã ojapoague repy.