Salmo 63

₁Xeruete, ndee ma Xeruete imbaraete va'e.

Xee ma roekaa rupi anhea'ã aikovy.

Ndere ma xerekovea nda'eveive.

Xerete re voi aendu ndere anhembojaxea,

yvy ipiru reia rupi yy re nda'evei va'e rami.

₂Mba'eta ndevygua henda iky'a e'ỹ va'e py aĩ vy

aikuaa pota va'ekue nembaraetea ha'e nerexakãa re.

₃Mba'eta xerekove 'rãgue py xee arovy'ave ndee xemboaxya.

Ha'e rami vy rogueroporaei 'rã.

₄Ha'e rami vy roguerovy'a 'rã aikove teria ja,

nderery rupi xepo aupi 'rã guive.

₅Xenhe'ẽ py avy'a nhandy ha'e xo'o hee va'e ha'u vy avy'aa rami avi.

Roguerovy'aa rupi xejuru py rogueroporaei.

₆Xerupa py xetuia rupi voi xema'endu'a 'rã ndere,

pyávy ndakevei vy aikuaa pota 'rã ndere,

₇xepytyvõa reiko ramo.

Ndepepo'ã py anhemi vy aporaei 'rã vy'a rupi.

₈Xenhe'ẽ ma ndere anho oĩ.

Ndepo reiporu kuaa regua re xejopy.

₉Ha'e rã xerekovea oipe'axe vy xereka va'e kuery ma

ho'apa 'rã yvykua vaikue py.

₁₀Remboaxa 'rã kyxe py ipo'aka va'e kuery pe,

jagua-tuvy nhe'ẽ rembi'urã rive ikuai aguã.

₁₁Ha'e rã huvixave ma ovy'a 'rã Nhanderuete re.

Hery rupi oura va'e kuery avi ovy'a 'rã okuapy.

Ha'e rã apu rupi ikuai va'e ma okyrirĩmba 'rã.