Salmo 55

₁Xeruete, ejapyxaka ke ajerurea re.

Endu e'ỹ eme ajapukaia.

₂Eikuaa pota ke xere, embovai xeayvua.

Ajexavai vy ndaikuaai rei,

nda'evei rei aikovy

₃xerovaigua kuery ijayvu rei ha'e

heko vai va'e xemoingo axy rei ramo.

Mba'eta xere ha'e kuery ombou xembojexavaiarã.

Xevy ipoxy vaipa vy xemomba 'rã.

₄Xekuraxõ otytypaa aendu xepy'a re.

Amano aguã gui akyjea aendu xere ou va'e.

₅Aryryipa reve aendu akyjea,

akyje vaipaa xere oĩ.

₆Ha'e rami vy xee aipoa'e:

“Apykaxu rami xepepo va'e rire

aveve avy vy ajou 'rãgue apytu'u aguã.

₇Ajava 'rãgue mombyry,

tekoa e'ỹa rupi aiko 'rãgue.

₈Ajou voi 'rãgue anhemi aguã,

yvytu vaikue ha'e yai opu'ã va'e gui”, ha'e.

₉Senhor, emomba ke xerovaigua kuery,

ejapo nhomongetaa py ndoikuaavei aguã rami,

mba'eta tetã py xee aexa joguero'a ha'e joe nda'ija'ei va'e anho.

₁₀Ara py ha'e pyávy ojere okuapy tetã kora yvýry rupi.

Kora mbyte py ikuai opa marã rei ha'e mba'emo vai apoa kuery.

₁₁Tetã mbyte oĩ 'rã nhomombaa.

Tape rupi ma ikuai nhomoingo axya ha'e nhombotavya.

₁₂Ha'e rami avi xerovaigua e'ỹ va'ekue ae xembojaru rei oikovy.

Ha'e rami e'ỹ va'e rire aropo'aka kuaa 'rãgue.

Ndaxerexaxei va'ekue e'ỹ xere ovy'a rei,

ha'e rami e'ỹ va'e rire ixugui anhemi 'rãgue.

₁₃Ha'e rami 'rãgue py ndee ava xee ramigua reiko va'e,

xereve renhemoirũ va'ekue ae,

xeirũ xepy'a py roayvuve va'e.

₁₄Joupive jaiko va'ekue, joupive javy'a va'ekue,

teta rupi jaa va'ekue Nhanderuete pegua oo katy.

₁₅Manoa tojopy voi ha'e kuery,

ha'e oikove reve toguejy yvykua py.

Mba'eta ngoo rupi mba'emo vai re anho oikuaa pota opy'a py.

₁₆Ha'e rã xee ma ajapukai 'rã Nhanderuete pe.

Ha'e ramo Senhor xereraa jepe 'rã.

₁₇Aje'ive, kuaray mbyte ha'e ka'aru'i ju

amombe'u 'rã aikotevẽ va'e ajapukai reve.

Ha'e ramo Senhor oendu 'rã xeayvua.

₁₈Eraa jepe ke xerekovea xerakykue monha va'e kuery gui aiko porã ju aguã,

mba'eta heta ete ikuai xerovaigua.

₁₉Nhanderuete oendu vy ombovai 'rã,

jypy'i guive opena va'e vy.

Mba'eta ha'e kuery re noĩ ojeko rerova aguã,

Nhanderuete renonde teĩ ojererokyjea rupi e'ỹ ikuai.

₂₀Ha'e va'e ava ma opu'ã hexeve peteĩ rami ikuai va'ekue re,

omboaxa rive peteĩ rami ikuai aguã ijayvuague.

₂₁Ijuru ma manteiga gui yxyĩve,

ha'e rã ipy'a re ma joe opu'ã aguã anho oĩ.

Ijayvua ma azeite gui iporãve merami

teĩ kyxe oekyi pyre rami nhomomba.

₂₂Senhor po py pemboaxa pendepy'a eta reia.

Ha'e ramo penemombaraete 'rã.

Peteĩve henda py ndoity ukai 'rã heko porã va'e.

₂₃Xeruete, yvykua vaikue py remombo 'rã

avakue tuguy moẽa ha'e nhombotavypa rei va'e.

Ha'e kuery ndoupityi 'rã oikove aguã va'ekue mbyte peve.

Ha'e rã xee ma ajerovia tema 'rã ndere.