Salmo 56

₁Xeruete, xemboaxy ke,

mba'eta avakue xejukaxe okuapy.

Ára pukukue re xemoingo axy xerero'a vy.

₂Xere opu'ã va'e xejukaxe okuapy.

Heta ete ikuai xere opu'ã va'e onhemboyvatevexe vy.

₃Akyjea aendu vy

ajerovia 'rã ndere.

₄Nhanderuete re ajerovia, ijayvua arovy'a guive.

Nhanderuete re ajerovia vy

ndakyjei 'rã mba'eve gui.

Mba'e 'rã tu imarã va'e ojapo kuaa xere?

₅Ára pukukue re ha'e kuery omombe'u 'rã xeayvukue ramigua.

Onhembopy'aa ma xere ojapo vai aguã anho.

₆Nhomboatypa okuapy nhemi rupi,

oma'ẽ mbegue 'rã aikoa re oikuaa pota vy,

xemomba aguã oarõ vy.

₇Embopaga ha'e kuery ojapo vaiague re.

Xeruete, eitypa yvy regua kuery ndepoxya py.

₈Reipapa ma ajexavaia rupi aikoague.

Xerexay voi remboyrupa nde'yryru py.

Xerekokue ha'e javi e'ỹ teve ipara ndekuaxia re?

₉Ndevy ajapukaia ára guive

xerovaigua kuery ojepe'apa 'rã.

Aikuaa porã Nhanderuete xereve oikoa.

₁₀Nhanderuete re ajerovia, ijayvua arovy'a guive.

Senhor re ajerovia, ijayvua arovy'a guive.

₁₁Nhanderuete re ajerovia aguã amoĩ vy

ndakyjei 'rã mba'eve gui.

Mba'e 'rã tu avakue ojapo kuaa xere?

₁₂Xeruete, ndevy anhemboayvuague ajapo ete 'rã,

roguerovy'a ete 'rã guive.

₁₃Mba'eta manoa gui xerekovea reraa jepe,

xepy guive reraa jepe ha'a aguã gui,

Xeruete renonde aiko aguã hexakã nhomoingovea rupi.