Salmo 53

₁Opa marã rei heko va'e ma opy'a py ijayvu vy

“Ndoikoi rima Nhanderuete” he'i 'rã.

Ha'e kuery opa marã 'rã ikuai teko vai ojapo vy.

Neĩ peteĩve ma ndoikoi 'rã heko porãa rupi.

₂Ha'e rã Nhanderuete ma yva gui oma'ẽ 'rã avakue ra'y kuery re,

oexa aguã amongue pa o'arandua rupi,

Nhanderuete oekaa rupi ikuaia oexa aguã.

₃Ha'e rami teĩ ha'e javive ojepe'a vy opa marã rei ikuai.

Ndoikovei ma teko porã rupi oiko va'e,

neĩ peteĩve.

₄“Teko vai rupi ikuai va'e 'arandurã noĩ teve?

Ha'e kuery ma xevygua kuery omomba rivepa 'rã mbojape ho'ua rami.

Nhanderuete pe ndojapukai 'rã guive.”

₅Ha'e rami teĩ ha'e kuery onhemondyipa 'rã,

okyje aguã jipoi teĩ.

Peẽ kuery re opu'ã rei va'ekue kãgue Nhanderuete omoaĩmba 'rã.

Ha'e kuery oxĩmba 'rã pendegui, Nhanderuete nopenavei ramo.

₆Sião tetã gui Israel kuery reraa jepearã ou vy ojekuaa ma 'rãgue!

Nhanderuete ojeupegua kuery omoingo porã jevy ramo

Jacó ramymino kuery, Israel kuery ovy'a ete 'rã okuapy.