Salmo 52

₁Ava ndepo'akapa va'e, mba'e re tu teko vai ri rejou porã?

Mba'eta Nhanderuete porayvua ma opa va'erã e'ỹ.

₂Ha'e rã ndee ma ndeayvu 'rã renhomomba aguã re anho.

Kyxe haimbe va'e jojuka va'e rami 'rã ndeayvu,

renhombotavy va'e vy.

₃Iporã va'e 'rãgue py mba'emo vai anho rejou porãve.

Anhetẽ rupi ndeayvu 'rãgue py ndeapuxe vai rive.

₄Ndee rejou porã va'e ma ayvu nhomokanhyarã anho,

renhombotavya rupi rive ndeayvu va'e vy.

₅Ha'e rami avi Nhanderuete nemomba 'rã raka'e rã peve.

Ndejopy vy ndepe'a 'rã heravy nderopy reĩa gui,

okuave va'e yvy gui ndepe'a xapy'a 'rã.

₆Ha'e nunga oiko rã

heko porã va'e kuery oexa vy ojererokyje 'rã.

Ha'e rami vy ojojai rei vy aipoe'i 'rã:

₇“Ha'e rami 'rã okanhy avakue Nhanderuete re e'ỹ imbaraete va'e.

Mba'eta omba'e rei-rei retaa re rive ojerovia,

ha'e opa marã rei ikuaia re rive onhemombaraete va'e.”

₈Ha'e rã xee ma oliveira rembypy ipyau va'e

Nhanderuete pegua roka py hi'aĩ va'e rami aiko.

Nhanderuete xemboaxya re ajerovia raka'e rã peve.

₉Ha'e rami repena rire

xee roguerovy'a 'rã raka'e rã peve.

Ndere ojerovia va'e kuery oendua py

roarõ reve xema'endu'a 'rã nderery re, iporã ramo.