Salmo 51

₁Xeruete, xemboaxy ke ndereko porãa rupi.

Opa mba'e py renhomboaxya rupi vy emboguepa ke ajejavyague.

₂Xeky'a'o xereko vaia gui,

xejoi ke ajejavyague gui.

₃Mba'eta xee ma aikuaa ae xereko vaia,

xema'endu'a riae aikovy ajejavyague re.

₄Nderovai ae ajejavy va'ekue, ndevy anho,

ndee rexaa py ajapo mba'emo vai.

Ha'e nunga rupi xee aikuaa anhetẽ meme xere ndeayvua,

ha'evea rami xembopagaa guive.

₅Xee ma teko vai py ma voi aiko'i va'ekue,

ha'i xerereko'i guive xere oĩ ae ma ajejavy aguã.

₆Ha'e rã ndee ma orepy'a re anhetẽ va'e oĩ va'e rerovy'a va'e,

ha'e rami vy xepy'apy py reikuaa uka 'arandua.

₇Xeky'a'o ke hissopo rogue py iky'a e'ỹ va'e ju aiko aguã,

xejoi ke, yro'y xiĩ va'e gui xiĩ porãve va'e aiko aguã.

₈Ejapo ke oporaeia ha'e ovy'aa rã aendu ju aguã rami,

xekãgue remou'ũmba rire teĩ avy'a nho aguã.

₉Ema'ẽ eme ajejavyague re,

emboguepa ke xereko vaia.

₁₀Xeruete, xere emoĩ kuraxõ pyau iky'a e'ỹ va'e,

xenhe'ẽ py xembopyau xereitya ve'ỹ aguã rami.

₁₁Xemoxẽ eme nerenonde gui,

neĩ xegui eipe'a eme guive Nenhe'ẽ Ky'a E'ỹ.

₁₂Xere emoĩ ju xereraa jepeague re avy'aa.

Xenhe'ẽ py xemombaraete ju xekyre'ỹ aguã rami.

₁₃Ha'e ramo 'rãe ambo'e heko vai va'e kuery ndereko re,

ha'e ramo ojejavypa va'ekue ojeko rerova 'rã ndevy.

₁₄Xeruete, xereraa jepe ke tuguy amoẽague gui,

Xeruete xereraa jepea.

Ha'e ramo aporaei reve arovy'a 'rã ndereko porãa.

₁₅Senhor, eipe'a ke xejuru,

ha'e ramo rogueroporaei 'rã.

₁₆Mba'eta ndererovy'ai mymba rojuka vy rome'ẽ va'e.

Ha'e rami e'ỹ va'e rire xee ame'ẽ ma 'rãgue.

Mba'emo roapy reve rome'ẽ va'e guive ndererovy'ai.

₁₇Ndee Oreruete pe rome'ẽ rã rerovy'a va'erã va'e ma orenhe'ẽ py nda'eveia roendua.

Orepy'a re rojejou vai ha'e ronhemboaxy ramo ma ndee Oreruete, noremboaxy e'ỹi 'rã.

₁₈Emoingo porã ke Sião pygua kuery remboaxya rupi vy.

Emoatyrõ uka ju Jerusalém tetã kora.

₁₉Ha'e rami vy rerovy'a 'rã teko porã rupi ikuai va'e mba'emo ome'ẽ ramo,

mba'emo oapy reve ome'ẽ va'e.

Ndevygua altar áry ome'ẽ 'rã okuapy vaka ra'y.