Salmo 50

₁Senhor Nhanderuete Ipo'akapa va'e ijayvu vy

oenoĩmba 'rã yvy regua kuery kuaray oua katy gui oikea katy peve ikuai va'e.

₂Sião tetã iporãve ete va'e gui

Nhanderuete oexa uka 'rã guexakãa.

₃Ha'e rami vy Nhanderuete ou 'rã, nokyrirĩ 'rã guive.

Henonde ma ou tata nhomombaarã,

ijyvýry rupi yvytu vaikue hevovo.

₄Ojeupegua kuery omboayvu aguã ou.

Ha'e rami vy yvate yva katy ojapukai 'rã,

yvy katy guive. Ha'e vy aipoe'i:

₅“Pemboatypa ke xevygua kuery iky'a e'ỹ va'e,

Ha'e va'e kuery ma mba'emo ome'ẽ va'e py xereve guarã onhemoingo va'ekue”, he'i.

₆Yva gui oikuaa uka heko porãa,

mba'eta nhomboayvua ma Nhanderuete ae.

₇“Xevygua kuery, pejapyxaka ke, ha'e rã xee xeayvu 'rã.

Israel kuery, amombe'u ta penderekokue.

Xee ma Penderuete, ‘Oreruete’ pejea va'e.

₈Mba'emo peme'ẽague re e'ỹ xeayvu pẽvy,

mba'emo peapy reve xerenonde pemoĩ riaea re e'ỹ guive.

₉Ha'e rami teĩ pendero gui xee ndaipotai vaka ra'y,

neĩ kavara kora gui peme'ẽ va'e.

₁₀Mba'eta xerymba meme ikuai ka'aguy regua,

yvyty áry mbovy rei e'ỹ vaka ikuai va'e guive.

₁₁Xee aikuaa guyra yvyty áry ikuai va'e ha'e javi,

xerymba meme ikuai vixo nhuũndy rupigua.

₁₂Xee akaruxe va'e rire aipo nda'ei 'rãgue pẽvy,

mba'eta yvy ma xemba'e itui,

hexe ikuai va'e ha'e javi avi.

₁₃Tyrã xee nda'u ha'u 'rã ri vaka ro'o?

Ay'u 'rã ri nda'u kavara ruguy?

₁₄Any, Penderuete pe peme'ẽ perovy'aa,

ha'e Yvate ete va'e pe pejapo kuerei penhemboayvuague.

₁₅Pejapukai ke xevy pejexavaia ára.

Ha'e ramo xee rogueraa jepe 'rã,

ha'e rã peẽ ma xemboete 'rã”, he'i.

₁₆Ha'e rã heko vai va'e pe ma Nhanderuete aipoe'i:

“Nda'evei peẽ kuery xeayvua aeja va'ekue re pendeayvu aguã ha'ekue-'ekue rami,

neĩ xereve guarã ajapo va'ekue rupi pendeayvu aguã.

₁₇Mba'eta napenhemo'arandu ukai,

xeayvua napendu potai vy.

₁₈Ha'e rã imonda va'e ma pexa vy perovy'a 'rã,

itavy rei va'e re guive penhemoirũxe vai.

₁₉Mba'emo vai re anho pendeayvu,

pendejuru py penhombotavya rupi anho pendekuai.

₂₀Pendeayvu rei peiny penderyvy re,

pendeayvu vaikue-ikue 'rã pendexy pi'a re ae.

₂₁Ha'e rami pendekuai teĩ xee akyrirĩ ranhe va'ekue.

Ha'e ramo pexa'ã ndee ramigua ae xee aikoa re.

Ha'e rami teĩ xee romboayvu 'rãe.

Ha'e nunga ha'e javi amoĩmba 'rã pexaa py.

₂₂Peẽ kuery Penderuete gui penderexarai va'e,

peikuaa pota pova'e re.

Ha'e rami e'ỹ ri ramo xee romondoropa 'rã,

ha'e ndoikoi 'rã penderepyarã.

₂₃Xererovy'aa ome'ẽ va'e ma xemboetea rupi ikuai.

Ha'e rami guape omoatyrõ va'e pe ma

aikuaa uka 'rã Penderuete pendereraa jepea.”