Salmo 49

₁Ha'e javi regua, pendu pota ke pova'e.

Yvy re pendekoa va'e ha'e javi, pejapyxaka ke.

₂Yvyĩgue'i ha'e yvatekueve,

perekopa va'e ha'e pendeporiaukue'i ha'e javi.

₃Ha'e gui xejuru py xeayvu 'rã 'arandu re,

xepy'a py 'arandua re anho 'rã aikuaa pota.

₄Ajapyxaka porã 'rã mba'emo re ombojoja vy ijayvua rã,

ndoikuaai pyre amombe'u porãve 'rã ixã reta va'e pu rupi.

₅Mba'e re tu jexavaia ára py akyje 'rã?

Xerakykue monha okuapy va'e ma teko vai rupi xejoko rei teĩ.

₆Ha'e kuery ma omba'e rei-rei re rive ojerovia,

mba'emo oguereko va'e re rive ovy'a va'e.

₇Anhetẽ avave rei ndojogua kuaai 'rã guyvy rekove.

Nhanderuete pe nome'ẽ kuaai 'rã jogueraa jepe aguã regua.

₈Mba'eta joekove jajogua aguã ma hepy vaipa.

Raka'e rã peve nanhanhea'ãvei 'rãgue

₉jajapo aguã oikove riae aguã rami,

yvykua py oguejy e'ỹ aguã.

₁₀Ha'e gui jaexa rã hi'arandu va'e voi omano 'rã.

Hi'arandu e'ỹ va'e ha'e ndoikuaai va'e joo rami meme 'rã opa,

ha'e amboae pe ju oeja 'rã omba'e rei-reikue.

₁₁Opy'a py aipoe'i: “Xero opa e'ỹ va'e hi'aĩ,

xerekoague ma raka'eve rã ikuai va'e peguarã” he'i teĩ.

Ha'e rami vy guery rupi ae 'rã omboery oyvy.

₁₂Ha'e rami teĩ avakue ojejou porã va'eri nda'ikuai riaei 'rã.

Ha'e rami 'rãgue py mymba rami avi okanhy 'rã.

₁₃Ha'e rami ikuai ojee ae ojerovia va'e,

hemimbo'e kuery ijayvua oguerovy'a va'e voi.

₁₄Ha'e rami teĩ vexa'i rami avi omboguejya 'rã yvykua py.

Ha'e kuery re opena va'erã ma manoa.

Yvykua katy meme 'rã oguejy.

Ha'e py ma iporãague hu'ũmba 'rã.

Ha'e kuery rekoarã oĩ va'e ma yvykua ae.

₁₅Ha'e rã xerekove ma Nhanderuete oepy 'rã manoa po'akaa gui,

ojea py xereru vy.

₁₆Penhemondyi eme amongue imba'e rei-reipave ovy rã,

ha'e ngoo pyguarã mba'emo porã ojouve ovy teĩ.

₁₇Mba'eta ha'e kuery omano vy mba'eve ndogueraai 'rã ngupive,

mba'emo porã oguereko va'ekue nomoirũvei 'rã.

₁₈Oikove teri jave ojejou porã 'rã,

ha'e ojeupe guarã ojou reta rã pavẽ ojou porã teĩ

₁₉ha'e va'e oo avi 'rã tuu kuery ooague py,

hexakã ndoexavei aguã py.

₂₀Avakue ojou porãmby nai'arandui vy

mymba rami avi 'rã okanhy.