Salmo 48

₁Yvate ete va'e ma Senhor oiko,

ha'evea rami jaroporaei

Nhanderuete pegua tetã py.

₂Ixupegua yvyty iky'a e'ỹ va'e ma yvate ete,

yvy jave re oguerovy'aa va'e.

Sião yvyty oĩ kuaray puku-a yke katy,

huvixave retã oĩa.

₃Tetã py oo ikorapa va'e rupi

Nhanderuete ojekuaa uka nhanhemi aguã yvate va'e rami.

₄Ha'e nunga rupi huvixa kuery nhomoirũmba jogueruvy va'ekue

okanhymba.

₅Tetã oexa vyve onhemondyipa.

Okyjepa vy onhamba.

₆Ha'e py ngyje rive ipo'aka ha'e kuery re,

oendu guive haxy imemby ta va'e rami.

₇Yvytu kuaray oua katy gui ou va'e py

rembovaipa Társis gui kanoã ou va'ekue.

₈Omombe'ua rã nhaenduague rami

jaexa Senhor ixondaro reta va'e pegua tetã py oiko va'e,

Nhanderuete pegua tetã py ae.

Nhanderuete omoĩ atã 'rã raka'e rã peve.

₉Oreruete, renhomboaxya re orema'endu'a

ndevygua templo mbyte roĩa py.

₁₀Oreruete, nderery oikuaa pavẽ 'rã.

Ha'e rami vy ndevy oporaei rã yvy apy peve 'rã onhendu.

Ndepo py ha'evea rami rejoguereko.

₁₁Tovy'aa Sião yvyty re,

Judá rajy kuery avi tovy'a ne'arandua re.

₁₂Peguata ke Sião rupi,

ha'e javi rupi pejere.

Peipapa torre ikuai va'e.

₁₃Peikuaa pota porã ikora yvatea re,

ha'e pexa pota oo ikorapa va'e ikuai va'e re,

raka'e rã ikuai va'erã pe pemombe'u kuaa aguã:

₁₄“Ha'e rami oiko Nhanderuete

raka'e rã peve guarã.

Nhanderereko 'rã nhamano peve.”