Salmo 47

₁Ha'e javi regua kuery, pejepopete ke.

Penema'endu'a Nhanderuete re, pevy'aa rupi penhendu.

₂Mba'eta Senhor yvateve ete va'e ma omboetevepy,

huvixave yvateve va'e yvy jave re ipo'aka va'e.

₃Amboae regua kuery re nhanembopo'aka vy

nhandepy guýry omoĩ yvy regua kuery.

₄Nhandevy guarã oiporavo nhandekuai aguã.

Ha'e va'e yvy ma hembiayvu Jacó ojou porã va'ekue.

₅Nhanderuete oẽ ovy oguerojapukai va'e mbyte rupi.

Mimby guaxu pu rupi guive Senhor oaxa ovy.

₆Peporaei Nhanderuete pe,

peporaei porã ixupe.

Peporaei nhanderuvixave pe,

peporaei porã ixupe.

₇Nhanderuete ma yvy jave regua ruvixave oiko.

Ixupe peporaei mboraei porã rupi.

₈Nhanderuete ipo'aka 'rã yvy regua kuery re.

Oguapy 'rã tenda openaaty iky'a e'ỹ va'e py.

₉Yvy regua ruvixa kuery onhemboatypa vy

Abraão Ruete pegua ju ikuai.

Mba'eta Nhanderuete peguarã ae ikuai yvy regua kuery hu'y jokoa oguereko va'ekue ha'e javi.

Ha'e anho yvate ete va'e oiko.