Salmo 46

₁Nhanderuete ma nhanhemiaty imbaraete va'e oiko,

nhandereraa jepearã jajexavai jave nhandea'i pyve oĩ va'e.

₂Ha'e nunga rupi ndajakyjei 'rã amboae rami yvy ojeapo teĩ,

ha'e yvyty ikuai va'e ye'ẽ mbyte py onhemombo,

₃yy opu'ã-pu'ã vy yjuipa,

opu'ã ovy ramo yvyty voi oryryipa teĩ.

₄Oĩ peteĩ yakã Nhanderuete pegua tetã mbyte rupi oxyry vy

ombovy'a 'rã ha'e pygua kuery,

Yvate ete va'e pegua oo iky'a e'ỹ va'e rupi voi.

₅Tetã mbyte ma Nhanderuete ae oĩ.

Ha'e ramo neĩ peteĩ henda py ma voi ndoityai 'rã.

Nhanderuete oipytyvõ 'rã ko'ẽmba guive.

₆Yvy regua kuery haxẽmba,

tetã ikuai va'e omyĩ 'rã.

Ha'e rã Nhanderuete oayvu omonhendu ramo yvy tykupa 'rã.

₇Nhandereve ma oiko Senhor ixondaro reta va'e,

Jacó Ruete ae oĩ nhanhemi aguã.

₈Peju ke pexa Senhor rembiapokue,

yvy re mba'emo ombovaipaague.

₉Mba'eta yvy apy peve omomba joe opu'ãa.

Omopẽmba guyrapa ha'e yvyra rakua,

karóxa joe opu'ãa pygua guive oapypa tata py.

₁₀Aipoe'i: “Pepytu'u peikuaa aguã xee ae Penderuete aikoa.

Xee ma xeyvate 'rã yvy regua kuery áryve,

yvy jave re ete 'rã xeyvate”, he'i.

₁₁Nhandereve oiko Senhor ixondaro reta va'e,

Jacó Ruete ae oĩ nhanhemi aguã.