Salmo 45

₁Ayvu porã anho oĩ xekuraxõ re.

Huvixave peguarã ae kova'e mboraei ajapo.

Ombopara porã kuaa va'e rami 'rã xeayvu.

₂Ndee ma avakue ra'y kuery ikuai va'e gui neporãve va'e.

Ndejuru gui ayvu porã anho oẽ.

Ha'e nunga rupi ae Nhanderuete nemoingo porã raka'e rã peve guarã.

₃Ndepy'a guaxuve va'e, emoĩ ndejee ndekyxe.

Emoĩ avi ndeyvatea ha'e ndepo'akaa.

₄Ndepo'akaa rupi tereo kavaju áry,

anhetẽ va'e ha'e teko porã re vy.

Ha'e gui ndepo reiporu kuaa regua ojapo 'rã nhomondyipaarã ojekuaa aguã rami.

₅Oreruvixave, nderu'y ma hakua porã,

nderovaigua kuery kuraxõ re oike 'rã.

Ha'e ramo yvy regua kuery nenhe'ẽ rendua rupi 'rã ikuai.

₆Xeruete, ndepo'akaa ma raka'e rã peve 'rã oĩ.

Ndepo'akaa py anhetẽ rupi 'rã rejoguereko.

₇Rerovy'a teko porã, ha'e rã teko vai ma rejou vai.

Ha'e nunga rupi ae Nhanderuete Nderuete huvixaverã nemoĩ vy

neakã áry azeite omoĩ neirũ kuery gui ndererovy'ave vy.

₈Ndeao ma mirra, aloés ha'e cássia gui heakuã porãmba.

Ndero ma marfim gui ojapo pyre.

Opy ma onhendu 'rã ixã va'e pu nembovy'aarã.

₉Kunhague ikuai 'rã nerembiguai, huvixave rajy kuery guive.

Reiporu kuaa regua re oĩ ndera'yxy,

ouro iporãve va'e Ofir guigua py ombojegua pyre.

₁₀Xerajy, endu ke. Eikuaa pota xeayvua re.

Nderexarai ke neretarã kuery ha'e nderu ro pygua kuery gui.

₁₁Ha'e ramo ma huvixave oguerovy'a 'rã neporãa.

Ha'e ma nde-Senhor ramo

henonde eĩ nerenapy'ã re.

₁₂Ndea py ou 'rã Tiro pygua rajy mba'emo ome'ẽ va'erã reve.

Heta va'e kuery regua oguerekopave va'e ojerure 'rã reipytyvõ aguã.

₁₃Opy ma oĩ 'rã huvixave rajy pavẽ gui iporãve va'e.

Ijao ma ouro guigua py ojegua va'e.

₁₄Ijao potypa va'e reve ogueroikea 'rã heruvy huvixave renonde.

Irũ kunhataĩgue hakykue ou va'e ogueru 'rã oĩa py.

₁₅Ovy'a ete reve 'rã ogueru,

huvixave ropy ogueroike 'rã.

₁₆Nderu kuery rekovia ndera'y kuery ikuai 'rã.

Ha'e va'e kuery remoĩ 'rã huvixarã yvy jave re.

₁₇Xee ajapo 'rã nderery re ima'endu'aa riae aguã rami.

Yvy regua kuery ndereroporaei 'rã raka'e rã peve.