Salmo 44

₁Oreruete, oreramoĩ kuery orevy omombe'u rã

roendu ma oreapyxa py

yma rupi rejapo va'ekue, ha'e kuery ikuai teri jave.

₂Ha'e jave py ma ndepo py reipe'apa raka'e yvy regua kuery,

ikuaiague py oreramoĩ kuery ju remoĩ atã aguã.

Yvy regua kuery remoingo axy,

ha'e rã oreru kuery pe ma reme'ẽ opa rupi ikuai aguã.

₃Okyxe py e'ỹ ha'e kuery oipe'a yvy,

imbaraete vy e'ỹ guive ipo'aka.

Ha'e rami 'rãgue py ndepo, ndejyva ha'e nderova rexakãa py

rembopo'aka raka'e ha'e kuery reayvu vy.

₄Xeruete, ndee ma xeruvixave.

Rejapo Jacó kuery ipo'aka aguã.

₅Ndee orepytyvõ ramo orepo'aka 'rã orerovaigua kuery re.

Nderery rupi ropyrõ 'rã orere opu'ã va'e re.

₆Xerapa re e'ỹ ajerovia,

xekyxe e'ỹ guive xereraa jepe 'rã.

₇Mba'eta ndee anho orerovaigua kuery gui orerepya reiko,

remoxĩmba 'rã orere ija'e e'ỹ va'e.

₈Oreruete re ae rovy'a riae,

raka'e rã peve roporaei 'rã nderery rupi.

₉Ha'e rã aỹ ma ndee oremombo ma mombyry,

ore kuery ju roxĩmba aguã py oremoĩ.

Ndereovei guive orexondaro kuery reve,

₁₀oreapo guive orerovaigua kuery gui ronhamba aguã rami.

Ha'e orere ija'e e'ỹ va'e kuery orereraa guembiguairã.

₁₁Vexa'i rami oremboaxa ma orejuka aguã katy.

Oremoaĩmba yvy regua kuery mbyte rupi.

₁₂Mba'eve re'ỹ guive remboekovia ndevygua kuery,

hepykue re mba'eve rejou aguã e'ỹ guive.

₁₃Ndee oreapo orea katy'i ikuai va'e gui roxĩmba aguã rami.

Orembojere okuapy va'e orere ijayvu rei ha'e orejojai rei.

₁₄Omombe'u pyrã rami oremoĩ yvy regua kuery mbyte.

Amboae regua oremboetea rupi e'ỹ ombovava-vava oakã.

₁₅Axĩmbaa oĩ riae xere,

xerova re axĩmbaa anho ojekuaa,

₁₆aendu xembojaru rei va'e, ijayvu vaikue-ikue va'e ojapukai ramo,

xerovaigua kuery xejukaxea aikuaa vy.

₁₇Ha'e nunga ha'e javi orere oiko.

Ha'e rami teĩ ndorerexarai ndegui,

ndorojepe'ai guive ndereve guarã rejapo va'ekue gui,

₁₈orepy'a py ndorojevyi ha'ekue py,

ndorojavyi guive ndeguigua tape.

₁₉Oremou'ũ ukapa jagua-tuvy nhe'ẽ ikuaia py,

ha'e manoa'ã py oreao'i.

₂₀Oreruete rery gui orerexarai va'e rire,

ha'e rami e'ỹ vy tuuete ramigua rive pe orepo roupi va'e rire

₂₁ha'e ramo nda'u Oreruete ndoikuaai 'rãgue teve?

Ha'e ma nhandepy'a re oĩ va'e oikuaapa.

₂₂Ha'e rami avi ndevygua orekuai ramo ae

ko'ẽ nhavõ oremboaxaa orejukaarã pe.

Vexa'i ojukaa aguã katy heraa va'e rami orekuai.

₂₃Emyĩ ke! Senhor, mba'e re tu reke?

Ema'ẽ ju ke orere, orejou vai riae eme.

₂₄Mba'e re tu nderejexa ukavei?

Nderexarai teve roiko axy vy rojexavaia re?

₂₅Mba'eta orerekovea ojexavai yvy ku'i peve,

orerete voi yvy re oje'apa maa rami.

₂₆Epu'ã ke orerepy aguã.

Orereraa jepe ndeporayvua rupi.