Salmo 28

₁Senhor, ndevy pe ajapukai.

Xe'itaova, endu e'ỹ eme ke xeayvua,

mba'eta naxembovai ramo

yvykua py oguejy va'e kuery rami akanhy 'rã.

₂Endu ke xereraa jepe aguã re ajapukai ramo,

nerenda iky'a e'ỹ va'e katy xepo aupi reve.

₃Xembotyryry eme ke heko vai va'e kuery

opa marã rei ikuai va'e reve.

Ha'e kuery ma ikuai porã aguã re merami rive ijayvu oirũ pe,

teĩ ipy'a re ma opa marãgua anho oĩ.

₄Embopaga ke ha'e kuery ojapoague rami,

mba'emo vai ojapoague re.

Eme'ẽ ha'e kuery opo py ojapoague rekovia,

embojoja ha'e kuery ojapoague repy.

₅Ha'e kuery ndoikuaa potai Senhor ojapo va'e re,

neĩ opo py ojapo va'ekue re.

Ha'e ramo Senhor oitypa 'rã, nomopu'ã jevyvei 'rã guive.

₆Ta'ima'endu'a porãa Senhor re,

xereraa jepe aguã re ajapukai ramo xerendu rire.

₇Senhor ae xemombaraetea ha'e mba'emo vai jokoa.

Hexe xekuraxõ ojerovia.

Ha'e xereraa jepe ramo xekuraxõ ovy'a,

ha'e ixupe aporaei reve amboete 'rã.

₈Senhor omombaraete 'rã ixupe ikuai va'e,

hembiporavo onhemi vy oo jepe aguã.

₉Eraa jepe ke ndevygua kuery,

emoingo porã ndevygua kuery.

Ha'e kuery re epena ha'e emboyvate raka'e rã peve.