Salmo 27

₁Senhor ma xemoexakãa ha'e xereraa jepea oiko.

Mava'e gui 'rã tu akyje?

Senhor ma xerekovea onhemi aguã.

Mava'e gui tu akyje ta?

₂Ha'e gui joapo vai va'ety kuery xere ou vy xemomba aguã,

xeavyky rei va'e ha'e xerovaigua kuery,

ha'e kuery onhepyxanga vy ho'apa 'rã okuapy.

₃Xondaro kuery heta xembojere teĩ

xepy'a py nanhemondyi 'rã.

Xere anho opu'ãmba teĩ ajerovia riae 'rã.

₄Peteĩ regua re tema ajerure Senhor pe,

ha'e va'e anho ajouxe:

ha'e va'e ma Senhor pegua oo py aiko aguã aikovea pukukue re,

Senhor rexakãa aexa aguã,

ha'e ixupegua templo py anhembo'e aguã.

₅Ha'e rami vy aĩ vaia ára xenhomi 'rã ojeupegua opy,

xemoinge 'rã ojeupegua oo py anhemi aguã.

Xereraa 'rã itaova áry.

₆Ha'e jave py xeakã ombo'yvate ju 'rã

xerovaigua kuery xembojere rei va'e áry.

Ixupegua oo py arovy'a vy mba'emo ame'ẽ 'rã.

Aporaei ha'e ambopu 'rã Senhor pe.

₇Senhor, endu ke xeayvua,

ndevy ajapukai rã.

Xemboaxy ha'e xembovai.

₈Xepy'a re amoĩ “Xereka ke xereve reiko aguã” 'rea.

Ha'e ramo roeka 'rã Senhor, ndereve aiko aguã.

₉Senhor, ejexa uka e'ỹ eme xevy.

Ndepoxy reve xemoxẽ eme xee nerembiguai.

Mba'eta ndee ma xepytyvõa reiko.

Xeruete xereraa jepea,

epena e'ỹ eme xere, xereja eme xeae'i.

₁₀Mba'eta xeru ha'e xexy xereja teĩ

Senhor xereru 'rã.

₁₁Senhor, xembo'e ke ndeguigua tape rupi aiko aguã,

tape jojaa rupi xerereko xere oma'ẽ mbegue va'e kuery gui.

₁₂Xemboaxa eme xerovaigua kuery oipotaa rami xerereko aguã.

Mba'eta xerovai opu'ã rei okuapy ayvu rive py,

joapo vai aguã re anho nhomongeta va'e.

₁₃Xee ajerovia Senhor porayvua aexa aguã

yvy re aikove teri reve.

₁₄Pearõ ke Senhor.

Pendekuerai eme, pendepy'a guaxu

ha'e pearõ tema Senhor.