Salmo 26

₁Senhor, xemboeko porã ke,

anhetẽ rupi anho aiko

ha'e Senhor re ajeroviaa gui ndajepe'ai rire.

₂Senhor, eikuaa pota ke aikoa re ha'e xekuaa.

Exa pota xepy'aa ha'e anhembopy'aa re.

₃Mba'eta ndeporayvua re xema'endu'a riae aikovy,

ndeguigua anhetẽ va'e rupi aiko.

₄Ndaguapyi guive avakue nhombotavypa rei va'e reve,

joayvu merami rive va'e kuery reve nanhemoirũi.

₅Opa marã rei ikuai va'e xee ndajou porãi,

ha'e heko vai va'e kuery reve ndaguapyi.

₆Ajepoei ajejavy e'ỹa aikuaa uka vy.

Ha'e rami vy Senhor, aiko ndevygua altar yvýry,

₇aporaei atã aguã ndevy,

nerembiapo porãa amombe'upa aguã.

₈Senhor, xee ma ayvu ndevygua oo,

nerexakã oĩaty.

₉Eipe'a eme xerekove heko vai va'e kuery reve,

xerekove eipe'a eme jouguy moẽa kuery reve.

₁₀Ha'e kuery po ma jojukaague re iky'a,

oiporu kuaa regua re ma teko vai repyrã rive oguereko.

₁₁Ha'e rã xee ma xereko porãa rupi aiko.

Xerepy ke xemboaxy vy.

₁₂Xepy oĩ atã yvy joja reia py.

Ha'e rami vy heta va'e kuery oendua py xema'endu'a porã 'rã Senhor re.