Salmo 25

₁Ndere Senhor, aroma'endu'a xenhe'ẽ.

₂Xeruete, ndere xee ajerovia va'e.

Axĩmba rei aguã rami e'ỹ ke xerereko,

xerovaigua kuery xere ovy'a rei e'ỹ aguã.

₃Ha'e rã nerarõ va'e kuery ma peteĩve noxĩmbai 'rã.

Oxĩmba va'erã ma nhemi rupi joapo vai va'e kuery.

₄Senhor, eikuaa uka xevy ndeguigua tape.

Xembo'e ke reikoa rupi aiko avi aguã.

₅Xerereko ndeguigua anhetẽ va'e rupi, xerekombo'e guive,

mba'eta ndee ma Xeruete xereraa jepea,

ndee ae roarõ aikovy ko'ẽ nhavõ.

₆Senhor, nema'endu'a ke renhomboaxy ha'e ndeporayvua rupi

jypy guive reikoa re.

₇Nema'endu'a eme ke xekunumi jave ajejavyague re,

neĩ nderovai xereko vaiague re.

Senhor, xemboaxya rupi anho ke nema'endu'a xere,

ndeporayvu va'e vy.

₈Senhor ma iporayvu ha'e heko porã va'e vy

ojejavypa va'e kuery pe oikuaa uka 'rã tape.

₉Yvyĩgueve ma ha'e oguereko 'rã teko porã rupi,

ombo'e 'rã ojeguigua tape rupi oiko aguã re.

₁₀Senhor guigua tape ha'e javi rupi oĩ nhomboaxya ha'e anhetẽ va'e,

guexeve guarã ojapo va'ekue ha'e ijayvuague rupi ikuai va'e pe.

₁₁Senhor, nderery remboete ukaa rupi vy

emboguepa xereko vaiague heta teĩ.

₁₂Avakue Senhor renonde ojererokyjea rupi ikuai va'e pe

oikuaa uka 'rã tape oo aguã.

₁₃Ha'e ramo ha'e kuery nhe'ẽ opytu'u 'rã ovy'a reve,

ha'e gui hamymino kuery jevy ikuai porã 'rã yvy re.

₁₄Senhor renonde ojererokyjea rupi ikuai va'e ma ha'e omonhemboja 'rã.

Ha'e va'e kuery pe oikuaa uka 'rã guexeve guarã ojapo va'ekue.

₁₅Ama'ẽ riae aikovy Senhor re,

mba'eta ha'e ae oipe'a 'rã xepy nhuã gui.

₁₆Ejevy ju xea py, xemboaxy ju,

mba'eta xeae'i aĩ vy ajexavai.

₁₇Xemombytu'u ke xepy'a py nda'eveia gui,

xepe'a ke ajexavaia gui.

₁₈Eikuaa pota aiko axya ha'e ajexavaia re,

ha'e emboguepa ajejavyague ha'e javi.

₁₉Eikuaa pota ke xerovaigua kuery re,

heta vaipa ramo.

Xere ija'e e'ỹ va'e kuery xembojeguaru rei okuapy.

₂₀Earõ xenhe'ẽ re, ha'e xerepy.

Taiko eme axĩmba rei aguã rami,

ndere anhemi rire.

₂₁Anhetẽ rupi ha'e teko porã rupi aikoa tojapo akanhy e'ỹ aguã rami,

mba'eta ndee ae xee roarõ.

₂₂Xeruete, eraa jepe Israel kuery

ikuai axya ha'e javi gui.