Salmo 2

₁Mba'e re tu yvy regua kuery ipoxypa ri?

Mba'e re tu yvy re ikuai va'e onhembopy'a okuapy ovare e'ỹ va'e re?

₂Mba'eta yvy regua huvixa kuery opu'ã okuapy,

huvixa ikuai va'e Senhor rovai jogueroayvu okuapy,

huvixarã Senhor omoĩ va'ekue rovai guive.

Ha'e vy aipoe'i:

₃“Nhamondo 'rã ha'e kuery nhanemoxãague,

jajora 'rã nhandepokuaague” he'i okuapy.

₄Ha'e rã yva re oguapy oiny va'e ma opuka 'rã,

Senhor ojojai 'rã ha'e kuery.

₅Ha'e rami vy ipoxya rupi ijayvu ete 'rã ha'e kuery pe.

Opoxya oexa uka vy omondyipa 'rã.

Ha'e vy aipoe'i 'rã:

₆“Xee ma xejeupegua huvixarã amoĩ ae ma

yvyty iky'a e'ỹ va'e Sião áry.”

₇Ha'e rã ha'e va'e ju aipoe'i: “Xee amombe'u 'rã Senhor ijayvuague.

Ha'e aipoe'i xevy: ‘Ndee ma xera'y.

Kova'e ára romoĩ.

₈Ejerure ke xevy,

ha'e ramo ndevy guarã xee ame'ẽ 'rã amboae regua kuery,

yvy apy re peve ndepo'aka aguã.

₉Popygua ferro guigua py remopẽ 'rã,

hyru yapo guigua ombovopaa rami 'rã remopẽmba’, he'i va'ekue xevy.”

₁₀Ha'e nunga rupi huvixa kuery, penheangu ke aỹ,

yvy regua huvixa kuery, pendu ke penemongeta rã.

₁₁Senhor pe ete ke pendekuai pejererokyjea rupi,

peporaei ixupe peryryipa reve.

₁₂Peayvua rupi pemboete Ta'y ipoxy e'ỹ aguã,

peikoa gui pekanhy e'ỹ aguã.

Ha'e rami e'ỹ rã are e'ỹ re oexa uka 'rã opoxya.

Ovy'a ete 'rã hexe onhemi va'e kuery ha'e javi.