Salmo 1

₁Ovy'a ete 'rã ava heko vai va'e kuery nhomongetaa rami ndoikoi,

ojejavypa rei va'e ikuaia rupi ndopytai,

neĩ nhombojaru rei va'e kuerya py voi oguapy e'ỹ va'e.

₂Ha'e rami 'rãgue py Senhor ayvu oguerovy'a vy

ara py ha'e pyávy ijayvua re anho oikuaa pota oikovy va'e.

₃Ha'e va'e ma yvyra yakã yvýry onhotỹ mbyre rami oiko,

hi'a aguã ára py porã hi'a va'e rami,

neĩ hogue ma ipiru rive'ỹ va'e rami.

Ha'e ma ojapo va'e ha'e javi oiko porã 'rã.

₄Ha'e rã heko vai va'e ma ha'e rami e'ỹ ikuai.

Ha'e kuery ma mba'emo pire yvytu opa rupi ogueraa va'e rami 'rã okanhy.

₅Ha'e nunga rupi nhomboayvua ára heko vai va'e ndoo jepei 'rã,

ojejavypa rei va'e ndopytai 'rã heko porã va'e ikuaia py.

₆Mba'eta Senhor oma'ẽ heko porã va'e oikoa re.

Ha'e rã heko vai va'e oikoa ma okanhy 'rã.