Salmo 148

₁Aleluia!

Peroporaei Senhor yva áryve rupi,

peroporaei yvate etea rupi!

₂Ixupegua anjo kuery ha'e javi, peroporaei pekuapy.

Ixondaro kuery yva regua ha'e javi, peroporaei pekuapy!

₃Kuaray ha'e jaxy, peroporaei pekuapy!

Jaxy-tata hendy va'e ha'e javi, peroporaei pekuapy!

₄Yva yvatevea rupi oĩ va'e, eroporaei avi,

yva áry yy ikuai va'e voi.

₅Togueroporaei okuapy Senhor rery!

Mba'eta ha'e ijayvu ramo opa mba'e oiko raka'e.

₆Omoĩ atã guive raka'e rã peve guarã.

Ha'e kuery ikuai aguã oeja va'ekue oaxa va'erã e'ỹ.

₇Yvy re pendekuai va'e, peroporaei Senhor,

ypo tuvixa va'e ha'e typya regua ha'e javi!

₈Onhemboxi va'e ha'e amandau,

yro'y apĩ ha'e yvy rataxĩ,

yvytu atã onhe'ẽ rendu va'e,

₉yvyty ha'e yvy'ã'i ikuai va'e,

yvyra hi'a va'e ha'e yary ikuai va'e,

₁₀mymba inharõ va'e ha'e vaka kuery,

yvy rupi otyryry ha'e guyra'i oveve va'e,

₁₁yvy regua huvixave kuery, ha'e javi regua guive,

yvatekueve ha'e yvy regua joe oikuaa pota va'e kuery ha'e javi,

₁₂kunumigue ha'e kunhataĩgue,

kakuakueve'i va'e ha'e kyrĩgue.

₁₃Togueroporaei okuapy Senhor rery,

mba'eta hery anho yvateve va'e.

Hexakãa ma yvy ha'e yva áryve rupi oĩ.

₁₄Ombopo'akave ojeupegua kuery,

ixupegua iky'a e'ỹ va'e kuery ha'e javi ogueroporaei aguã,

hembiayvu Israel kuery regua guive.

Aleluia!