Salmo 147

₁Peporaei Senhor pe!

Ha'eve ha'e iporã ete Nhanderuete pe japoraeia.

Jaroporaeia ma iporã ixupe voi.

₂Senhor omoatyrõ ju Jerusalém tetã,

oguerupa ju Israel kuery omoaĩmba pyre.

₃Omonguerapa 'rã opy'a py ikangy va'e,

ijai oipoanomba 'rã guive.

₄Oipapa jaxy-tata ikuai va'e,

peteĩ-teĩ hery rupi 'rã oenoĩ.

₅Nhande-Senhor ma yvate ete ha'e ipo'akapa va'e.

Hi'arandua ndajaikuaapai 'rã.

₆Senhor ma yvyĩgue'i repya oiko,

ha'e rã heko vai va'e ma omombo 'rã yvy rupi.

₇Peporaei Senhor pe perovy'aa rupi.

Mba'epu ixã reta va'e py pembojoguy vy peporaei Nhanderuete pe.

₈Ha'e ma yva onhovã 'rã arai py.

Oky oguereko katu yvy re guarã.

Yvyty ikuai va'e re ojapo mba'emo henhoĩ aguã rami.

₉Mymba kuery pe ome'ẽ 'rã ho'u va'erã,

uruvu ra'y kuery pe guive, ojapukai ramo.

₁₀Ha'e ma kavaju mbaraetea oguerovy'a va'e'ỹ,

neĩ xondaro mbaraetea e'ỹ guive.

₁₁Senhor oguerovy'a 'rã henonde ojererokyjea rupi ikuai va'e,

ha'e nhomboaxya oarõ okuapy va'e anho.

₁₂Jerusalém pygua kuery, peroporaei ke Senhor!

Sião tetã pygua, peroporaei Penderuete!

₁₃Mba'eta peneretã mbyte rupi omoĩ atãve ikora rokẽ jokoa,

ha'e penda'y kuery omoingo porã 'rã.

₁₄Pendeyvy katy rai'i rupi ikuai va'e reve omoĩ pendekuai porã aguã,

ha'e trigo iporãve va'e re penemongaru.

₁₅Yvy rupi ha'e oikuaa uka 'rã ojapo uka va'e,

ijayvua ojekuaa pojava 'rã ovy.

₁₆Vexa'i rague rami ombou 'rã yro'y apĩ,

yro'y xiĩ voi omoaĩ 'rã tanhimbu rami.

₁₇Yro'y hatã va'e ha'e omombo 'rã ikurekue rami.

Mava'e nda'u ogueropo'aka 'rã yro'y ombou rã?

₁₈Ha'e gui ma oayvu ombou ramo tykupa ju 'rã.

Yvytu oipeju aguã rami ojapo ramo

yy oxyry 'rã.

₁₉Oayvu oikuaa uka Jacó kuery pe,

ojeguigua lei ha'e nhombo'ea oeja Israel kuery pe.

₂₀Ha'e ramigua ma amboae regua pe ma ndoejai.

Amboae kuery ma nhombo'ea ndoikuaai okuapy.

Aleluia!