Salmo 143

₁Senhor, endu ke anhembo'ea.

Ejapyxaka ajerurea re.

Xembovai ke, ojeroviapy ha'e heko porã va'e reiko vy.

₂Nerembiguai aiko ramo xemboayvu eme,

mba'eta nerenonde heko porã ete va'e ndoikoi.

₃Ha'e gui xerovaigua kuery ma xerakykue monha,

yvy rupi xereity vy xere opyrõmba.

Xemoĩ pytũa py,

yma ete ma omano va'ekue rami.

₄Ha'e nunga rupi xenhe'ẽ nonhanimavei,

xepy'a eta rei ma guive.

₅Xema'endu'a teĩ yma guare re.

Aikuaa pota aikovy nerembiapokue ha'e javi re,

xema'endu'a ndepo py rejapo va'ekue re.

₆Ha'e nunga rupi xepo aupi ndevy.

Xenhe'ẽ nda'evei ndere, yvy ipiru reia rami.

₇Senhor, xembovai voi ke,

mba'eta xenhe'ẽ py nanhanimavei ma.

Ejexa uka e'ỹ eme xevy,

omanogue rupa py oguejy va'e rami apyta e'ỹ aguã.

₈Ndere ajerovia ramo

aje'ive reve taendu ndegui xemboaxya.

Ndere xenhe'ẽ aroma'endu'a ramo

exa uka tape aguata aguã va'e.

₉Senhor, xereraa jepe ke xerovaigua kuery gui,

mba'eta ndee ma anhemiaty.

₁₀Xembo'e ke ndee reipotaa rupi aiko aguã,

mba'eta ndee ae Xeruete.

Nenhe'ẽ Porã taxerereko

yvy joja porãa rupi.

₁₁Senhor, nderery re vy xemoingove.

Ha'evea rami rejoguerekoa rupi

eipe'a xenhe'ẽ ojexavaia gui.

₁₂Xemboaxya rupi emokanhymba xerovaigua kuery.

Emomba ke xenhe'ẽ mbojexavaia kuery ha'e javi,

nerembiguai aiko ramo.