Salmo 144

₁Ima'endu'a porãmby toiko Senhor xe'itaova.

Ha'e ma omombaraete 'rã xepo joe apu'ã aguã,

xekuã voi ombo'e 'rã joe apu'ã aguã.

₂Ha'e ma xemboaxya ha'e oo ikorapa va'e aĩ aguã,

anhemiaty yvate va'e ha'e xereraa jepea,

mba'emo vai jokoa oiko ramo ajerovia hexe.

Ha'e ojapo xeretarã kuery apenaa rupi ikuai aguã rami.

₃Senhor, marã ramigua tu avakue, ha'e kuery re reikuaa pota aguã?

Marã ramigua tu avakue ra'y kuery, reayvu aguã?

₄Mba'eta avakue ma yvytu rami rive ikuai.

Oikovea ára ma kuaray'ã rami 'rã oaxa ovy va'e.

₅Senhor, eipe'a ke yva, ha'e eguejy.

Epoko yvyty re, ha'e ramo oẽ 'rã hataxĩ.

₆Embou overa va'e xerovaigua kuery moaĩmbaarã.

Emombo nderu'y omondyipa aguã.

₇Ekuave'ẽ yvate gui,

xereraa jepe ha'e xerenoẽ yy typya gui,

amboae regua kuery po'akaa gui ae.

₈Ha'e kuery ojuru gui apu rupi anho 'rã ijayvu,

ha'e oiporu kuaa regua py anhetẽ va'e'ỹ 'rã ojapo.

₉Xeruete, ndevy pe amonhendu 'rã mboraei pyau.

Mbaraka dez ixã va'e ambopu vy rogueroporaei 'rã.

₁₀Senhor ojapo 'rã huvixa kuery ipo'aka aguã rami.

Guembiguai Davi ogueraa jepe 'rã kyxe jojukaa gui.

₁₁Xereraa jepe ke, xepe'a amboae regua po'akaa gui.

Ha'e kuery ojuru gui apu rupi anho 'rã ijayvu,

ha'e oiporu kuaa regua py anhetẽ va'e'ỹ 'rã ojapo.

₁₂Orera'y kuery ipyau va'e ta'ikuai mba'emo rogue iporã va'e rami,

ha'e orerajy kuery ta'ikuai ita oo ytarã rami,

huvixave ro reguarã ombojegua pyre rami.

₁₃Oreroguy tatynyẽ romono'õ va'ekue,

opa marãgua tembi'u toĩ.

Orerymba kuery vexa'i taetave tovy,

oreyvy rupi mbovy rei e'ỹ tata'y.

₁₄Orerymba vaka voi ta'imbaraete,

toity eme gua'y'i, ta'ikuai porã e'ỹ eme guive.

Oreretã mbyte rupi tonhendu eme ipy'a vaia rupi ojae'o va'e.

₁₅Ovy'a ete 'rã ha'e rami ikuai va'e kuery.

Tá, ovy'a ete 'rã Senhor pe “Nhanderuete” he'i okuapy va'e.